రాజకీయాలు ఎంతలా దిగజారిపోయాయో చెప్పడానికి ఇదొక చిన్న ఉదాహరణ మాత్రమే. ప్రజా ప్రతినిథికి, అందునా మంత్రికి ప్రజల నుంచి నిరసన ఎదురయ్యింది. ఎన్నికల్లో ఇచ్చిన హామీలు నెరవేర్చలేదనీ, సంక్షేమ పథకాలంటూ పబ్లిసిటీ స్టంట్లు చేస్తున్నారనీ, రోడ్లు కూడా వెయ్యడంలేదనీ.. అబ్బో ఒకటా.? రెండా.? కుప్పలు తెప్పలుగా జనం నుంచి సమస్యల చిట్టా తెరపైకొస్తోంది.. అధికార పార్టీ మీద జనం దుమ్మెత్తిపోస్తున్నారు.
చాలా చోట్ల వైసీపీ ప్రజా ప్రతినిథులకు మహిళలు చీపుళ్ళతో ఎదురెళుతున్నారు.. కొట్టడంలేదుగానీ, ఆ స్థాయిలో ‘సన్మానం’ చేసి పంపిస్తున్నారు. ‘ఏం ఖర్మరా బాబూ.? ముఖ్యమంత్రి హెలికాప్టర్లో తిరుగుతారు.. పరదాలు కట్టించుకుని మరీ పర్యటనలు చేస్తారు.. ఐడీ కార్డులిచ్చి తమకు ఇబ్బంది లేదనుకున్నప్పుడే జనంతో మాట్లాడతారు.. మమ్మల్ని మాత్రం జనం ముందర బలి చేస్తున్నారు..’ అన్న భావన ‘గడప గడపకీ మన ప్రభుత్వం’ కార్యక్రమంలో పాల్గొంటున్న చాలామంది వైసీపీ ప్రజా ప్రతినిథుల్లో వ్యక్తమవుతోంది.
అయినాగానీ, ‘గడప గడపకీ మన ప్రభుత్వం’ కార్యక్రమంలో పాల్గొని తీరాల్సిందేనంటూ అధినేత వైఎస్ జగన్ హుకూం జారీ చేసిన దరిమిలా, వైసీపీ ప్రజా ప్రతినిథులు.. జనాలతో చీవాట్లు తినక తప్పడంలేదు. తాజాగా మంత్రి అంబటి రాంబాబుకీ సొంత నియోజకవర్గంలో చుక్కెదురయ్యింది.
మహిళలు సంధిస్తున్న ప్రశ్నలకు సమాధానం చెప్పలేక, మహిళలు నిలదీస్తుంటే తట్టుకోలేక.. చల్లగా అక్కడి నుంచి జారుకున్నారు మంత్రి అంబటి రాంబాబు. ఈ వ్యవహారంపై సహజంగానే సోషల్ మీడియాలో, మెయిన్ స్ట్రీమ్ మీడియాలో, వెబ్ మీడియాలో కథనాలు వస్తాయి, వచ్చాయి కూడా.
అత్త తిట్టినందుకు కాదు, తోటికోడలు నవ్వినందుకు.. అన్న చందాన, మహిళలు చేసిన సత్కారానికి కాదు, మీడియా ఆ విషయాన్ని కవర్ చేసినందుకు మంత్రి అంబటి రాంబాబుకి కోసమొచ్చింది. ఆ కోపంలోనే సెటైర్లు వేసేశారు. నిలదీసినోళ్ళు టీడీపీ, జనసేన బ్యాచ్.. అని తేల్చేశారు అంబటి. అయినాగానీ, ‘టీడీపీ అనుకూల మీడియాలో స్క్రీన్ స్పేస్ దక్కినందుకు థ్యాంక్స్..’ అనేశారు మంత్రిగారు.
మరీ, వైసీపీ నాయకులు ఇలా తయారయ్యారేంటి.? అంటూ నెటిజనం కామెంట్లు వేయడం సహజమే. ఇప్పటికన్నా, గతంలో ‘సుకన్య వ్యవహారంలో దక్కిన మీడియా స్క్రీన్ స్పేస్’ ఎక్కువ కదా.? అంటూ ఆ నెటిజనమే అంబటి రాంబాబుని ట్యాగ్ చేస్తూ సెటైర్లు వేస్తుండడం గమనార్హం.
367788 641466But wanna comment which you have a really nice internet internet site , I really like the style and style it truly stands out. 530217