మెగాస్టార్ బర్త్ డే స్పెషల్స్: చిరంజీవి నటనను ఆవిష్కృతం చేసిన ‘స్వయంకృషి’

చిరంజీవికి వచ్చిన మాస్ ఇమేజ్ తో నెంబర్ వన్ హీరోగా.. మెగాస్టార్ గా తెలుగు సినిమాను ఏలేశారు. డ్యాన్స్, ఫైట్లతో ఇండస్ట్రీని షేక్ చేస్తున్న సమయంలో నట విశ్వరూపాన్ని చూపే సినిమా చేశారు. అదే ‘స్వయంకృషి’. నిజజీవితంలో ఎలా కష్టపడి, అందివచ్చిన అవకాశాన్ని సద్వినియోగం చేసుకుని తారాపథంలో నిలిచారో స్వయంకృషిలో ఆ ప్రస్థానాన్నే చూపారు. సుప్రీంహీరోగా వెలిగిపోతున్న చిరంజీవి చెప్పులు కుట్టే పాత్రలో నటించడం ఓ సంచలనం. కథపై ఉన్న నమ్మకం.. తనలోని నటనను ఆవిష్కృతం చేయాలనే తపనతో చిరంజీవి చేసిన ఈ ప్రయత్నం ఆయన కెరీర్లో ప్రత్యేకంగా నిలిపింది.

పాత్రలో ఒదిగిపోయిన చిరంజీవి..

అప్పటివరకూ తనదైన వేగంతో బ్రేక్ డ్యాన్సులు, ఫైట్లు చేసిన చిరంజీవిని.. చెప్పులు కుడుతూ జీవితంలో ఎదగాలనే లక్ష్యంతో ఉన్న సాంబయ్య పాత్రలో చూసి ప్రేక్షకాభిమానులు ఫిదా అయిపోయారు. తనను కాకుండా సాంబయ్య మాత్రమే కనిపించేలా చిరంజీవి జీవించిన విధానమే కారణం. విజయశాంతి సినిమాకు మరో ప్రాణం. చిరంజీవి మేనల్లుడి కోసం తాను త్యాగం చేసే గంగ పాత్రలో ఒదిగిపోయారు. సినిమాకు రమేశ్ నాయడు అందించిన పాటలు, నేపథ్య సంగీతం ప్రేక్షకుల్ని తన్మయత్వంలో ముంచేస్తుంది. స్వాతిముత్యం తరహాలో నటనకు అవకాశం ఉన్న పాత్ర చేయాలని ఉందని చిరంజీవి ఓ సందర్భంలో అన్నమాటను గుర్తు పెట్టుకుని చిరంజీవికి ఈ కథ వినిపించారు దర్శకులు కె.విశ్వనాధ్.

ఉత్తమ నటుడిగా..

చిరంజీవి నటన, కె.విశ్వనాధ్ దర్శకత్వ ప్రతిభ సినిమాను మరోస్థాయిలో నిలబెట్టాయి. 1986 సెప్టెంబర్ 3న విడుదలైన స్వయంకృషి బాక్సాఫీస్ వద్ద సూపర్ హిట్ అయింది. 26 కేంద్రాల్లో శతదినోత్సవం జరుపుకుంది. సినిమాలో చిరంజీవి నటనకు తొలిసారి ఉత్తమ నటుడిగా నంది అవార్డు వచ్చింది. విజయశాంతికి ఉత్తమ నటిగా ఫిలింఫేర్ అవార్డు దక్కింది. స్వయంకృషిని రష్యన్ భాషలోకి డబ్ చేశారు. మాస్కో ఇంటర్నేషనల్ ఫిలిం ఫెస్టివల్ లో ప్రదర్శించారు. వీటితోపాటు ఇంటర్నేషనల్ ఫిలిం ఫెస్టివల్, ఆసియా ఫసిఫిక్ ఫిలిం ఫెస్టివల్ లో కూడా ప్రదర్శితమైందీ సినిమా. పూర్ణోదయా క్రియేషన్స్ బ్యానర్ పై ఏడిద నాగేశ్వర రావు ఈ సినిమా నిర్మించారు.