దేవుడి విగ్రహానికి ‘రాజకీయ గ్రహణం’.. కళ్ళు తెరవరేం.?

ఫొటోలో కనిపిస్తున్నది హనుమంతుడి విగ్రహం.. కాదు కాదు, ధ్వంసమైన హనుమంతుడి విగ్రహం. ఈ ఘోరాన్ని నేను చూడలేనంటూ హనుమంతుడు కళ్ళు మూసుకుని వున్నట్లుగా వుంది కదా.? ఇది, శ్రీకాకుళం జిల్లాలోని ఓ దేవాలయానికి సంబంధించిన విగ్రహం. రోడ్డు విస్తరణ పనుల్లో భాగంగా దేవాలయాన్ని కూల్చివేయాల్సి వచ్చిందట.

‘అబ్బే, ఇది అన్ని అనుమతులతో జరుగుతున్న ప్రక్రియ..’ అంటూ కొందరు కవరింగ్ ఇస్తున్నారు. ‘విరిగింది హనుమంతుడి బొమ్మ మాత్రమే కదా..’ అని ఎవరన్నా అంటే, అంతకన్నా హాస్యాస్పదం ఇంకోటుండదు. గత కొంతకాలంగా ఆంధ్రప్రదేశ్ రాష్ట్రంలో దేవాలయాల మీద దాడులు జరుగుతున్నాయి.

‘వాళ్ళే దాడులు చేస్తున్నారు.. వాళ్ళే ధర్నాలు చేస్తున్నారు..’ అంటూ ఆ మధ్ ముఖ్యమంత్రి వైఎస్ జగన్ మోహన్ రెడ్డి విపక్షాల మీద తీవ్రస్థాయిలో విరుచుకుపడ్డారు. మరి, ‘వాళ్ళను’ ఎందుకు అరెస్ట్ చేయడంలేదు.? అన్నది మిలియన్ డాలర్ల ప్రశ్న.

కొద్ది రోజుల పాటు దేవాలయాలపై దాడులు కాస్త తగ్గుముఖం పట్టినా, మళ్ళీ ఈ పైత్యం మొదలైంది. ప్రభుత్వాన్ని అస్థిరపరిచేందుకు స్వార్ధపరులు కుట్ర పన్నుతున్నారన్న ప్రభుత్వ పెద్దల మాటలే నిజమైతే, అలాంటి స్వార్ధపరుల.. కుట్రదారుల ఆటలు రాష్ట్రంలో ఎందుకు చెల్లుబాటవుతున్నాయి.? అసలు పోలీసు వ్యవస్థ ఏం చేస్తోంది.?

పగిలింది హనుమంతుడి విగ్రహం కాదు.. కోట్లాది మంది హిందువుల ఆత్మగౌరవం. విగ్రహానికి హిందూ ధర్మంలో వున్న ప్రాముఖ్యత అంతా ఇంతా కాదు. కానీ, ‘విరిగింది హనుమంతుడి బొమ్మ తాలూకు చెయ్యే కదా..’ అని ఓ మంత్రిగారు లైట్ తీసుకోవడం హాస్యాస్పందం.

దేవాలయాల్ని ఏ కారణం చేత అయినా పడగొట్టాల్సి వస్తే, వాటిని పునర్నిర్మించాల్సి వస్తే.. ప్రతి విగ్రహాన్నీ అత్యంత జాగ్రత్తగా తీయాల్సి వుంటుంది. దేవాలయమ్మీద చెక్కిన బొమ్మలైనా అంతే. వాటినీ గర్భగుడిలోని దేవతామూర్తిగానే హిందూ ధర్మొ కొలుస్తుంటుంది. కానీ, దురదృష్టం.. ఆంధ్రప్రదేశ్‌లో దేవుడి విగ్రహాలపై అఘాయిత్యాలు పెరుగుతూనే వున్నాయ్. ఈ పాపానికి బాధ్యత ఎవరిది.?