జనసైనికుడొక్కడే.. వైఎస్‌ జగన్‌ని తట్టుకోగలడా.!

23 మంది ఎమ్మెల్యేల బలంతో అసెంబ్లీలో ప్రతిపక్ష నేతగా తాను ఏం సాధించగలను? అన్న అయోమయంలో వున్నారు మాజీ ముఖ్యమంత్రి, తెలుగుదేశం పార్టీ అధినేత నారా చంద్రబాబునాయుడు. అంచనాలు తల్లకిందులై, అత్యంత ఘోర పరాజయం చవిచూశాక చంద్రబాబు దయనీయ స్థితి ఇది. కానీ, జనసేన పార్టీ పరిస్థితి వేరు. కార్యకర్తల్లో, నేతల్లో ధైర్యాన్ని నూరిపోస్తున్నారు జనసేన అధినేత పవన్‌కళ్యాణ్‌. తమ అధినేత ఓటమికి, తమ పార్టీ అంచనాలు అందుకోలేకపోవడానికీ కారణాలేంటో జనసైన్యానికి బాగా తెలుసు. అందుకే, పార్టీ పటిష్టత కోసం జనసైనికులు నడుం బిగిస్తున్నారు.

మరోపక్క, అసెంబ్లీలో ఒకే ఒక్క సైనికుడిగా ఎంపికైన రాజోలు ఎమ్మెల్యే రాపాక వరప్రసాద్‌పై వైఎస్సార్‌ కాంగ్రెస్‌ పార్టీ వల వేస్తోందనీ, భారతీయ జనతా పార్టీ నుంచి సైతం ఆయనపై ఒత్తిళ్ళు పెరుగుతున్నాయనీ ప్రచారం జరుగుతున్న విషయం విదితమే. ఈ ప్రచారంపై స్పందించిన రాపాక వరప్రసాద్‌, బీజేపీ గురించి ఆలోచించడంలేదనీ, వైఎస్సార్‌ కాంగ్రెస్‌ పార్టీలో చేరితే తన నెంబర్‌ 152 (ఆ పార్టీ ఎమ్మెల్యేలు 151 మంది గనుక, ఈయన అటు వైపు వెళితే ప్లస్‌ వన్‌.. అంటే, 152 అన్నమాట) అని రాపాక వరప్రసాద్‌ సెటైర్‌ వేశారు.

జనసేన నుంచి ఒకే ఒక్క ఎమ్మెల్యేగా తాను గెలవడమంటే, తన మీద ప్రజలు చాలా బాధ్యత వుంచారనీ, జనసేన పార్టీ కోసం అహర్నిశలూ పనిచేస్తాననీ, జనసేన వాయిస్‌ని బలంగా విన్పిస్తాననీ రాపాక వరప్రసాద్‌ చెప్పారు. జనసేన అధినేత పవన్‌కళ్యాణ్‌ని తాజాగా కలిసిన రాపాక వరప్రసాద్‌, అసెంబ్లీలో ఎలా వ్యవహరించాలన్నదానిపై పవన్‌కళ్యాణ్‌తోనూ, పార్టీ ముఖ్య నేతలతోనూ చర్చించారు. పార్టీ పటిష్టత కోసం తన అభిప్రాయాల్ని పార్టీ అధినేతలతో రాపాక చర్చించినట్లు తెలుస్తోంది. 4

మరోపక్క, రాపాకను ఘనంగా సత్కరించేందుకు జనసేన పార్టీ ప్రత్యేకంగా సన్నాహాలు చేస్తున్నట్లు సమాచారమ్‌. ఏదిఏమైనా, రాపాక వరప్రసాద్‌కి, అసెంబ్లీలో అధికార పక్షాన్ని ఎదుర్కోవాల్సి వస్తే అది కత్తి మీద సాము లాంటి వ్యవహారమే. వైసీపీ – టీడీపీ ఆరోపణలు, ప్రత్యారోపణల నడుమ అసెంబ్లీ దద్దరిల్లిపోతోంటే, రాపాక వాయిస్‌ విన్పిస్తుందా? అన్నది మిలియన్‌ డాలర్ల ప్రశ్న. అయితే శాసనసభ్యుడిగా అసెంబ్లీలో తనకు దక్కిన సమయాన్ని నియోజకవర్గ సమస్యల పరిష్కారం కోసం, రాష్ట్ర ప్రజల కోసం వినియోగిస్తానని అంటున్నారాయన.