వూహాన్ ల్యాబ్ మరో దురాగతం..! వయాగ్రా దోమల వ్యాప్తి..! జరిగింది.. ఇదీ..

కరోనా వైరస్ పుట్టిందనే ఆరోపణలున్న వూహాన్ ల్యాబ్ నుంచి మరో ప్రమాదకరమైన వైరస్ లీకైందనే వార్త ప్రకంపనలు రేపుతోంది. ఓ పరిశోధకుడి నిర్లక్క్ష్యంతో ల్యాబ్‌ నుంచి వయాగ్రా ఇంజెక్ట్‌ చేసిన వేల కొద్దీ దోమలు బయటపడ్డాయని నిర్వాహకులు ప్రకటించారు. ఈ దోమల దాడి విపరీత పరిణామాలకు దారి తీసిందని తెలుస్తోంది. దోమలు కుట్టినోళ్లు లైంగిక కోరికలతో రగిలిపోతూ వికృతంగా ప్రవర్తిస్తున్నారు. ఆస్పత్రి పాలవుతున్నారు. ప్రస్తుతం ఈ వార్త వైరల్‌ అవుతోంది. వరల్డ్‌ న్యూస్‌ డెయిలీరి పోర్ట్‌ డాట్‌ కామ్‌ అనే వెబ్‌ సైట్‌ ప్రచురించిన కథనం ప్రకారం..

వయాగ్రా దోమలతో చైనాలో అనర్థాలు జరుగుతున్నాయనేది ఈ వార్త సారాంశం. వుహాన్‌కి చెందిన 87 ఏళ్ల వృద్ధుడు సెక్స్ కోరికల్ని తట్టుకోలేక ఆస్పత్రిలో చేరాడు. మరో పేషెంట్‌ నగ్నంగా తిరుగుతూ విపరీత చేష్టలకు పాల్పడ్డాడు. మరో వ్యక్తి కనిపించిన వాళ్లపై లైంగిక దాడికి చేస్తున్నాడని వుహాన్‌ కెచ్‌లీ ఆస్పత్రి డాక్టర్లు అంటున్నారు. ఇప్పటికే కరోనాతో ప్రపంచం అల్లకల్లోలమైపోతుంటే.. ఇప్పుడీ కొత్త ఉపద్రవం ఎటువంటి విపరిణామాలకు దారి తీస్తుందోనని ఆందోళన వ్యక్తం చేస్తున్నారు వుహాన్‌ ల్యాబ్‌ హెడ్‌ రీసెర్చర్‌ డాక్టర్‌ వెంజి యింగ్‌ యిన్‌ జింగ్‌.

అయితే.. ఇదంతా ఫేక్ న్యూస్. వరల్డ్‌ న్యూస్‌ డెయిలీ రిపోర్ట్‌ డాట్‌ కామ్‌ అనే ఈ వెబ్ సైట్ ఇటువంటి వార్తలను ప్రచురిస్తుంది. ఈ వెబ్ సైట్ క్యాప్షనే ‘నిజనిర్థారణలతో సంబంధం లేదు’ అని ఉంటుంది. వీరు పబ్లిష్ చేసే కంటెంట్ నిజమని గుడ్డిగా నమ్మేంతగా.. అధికారిక సమాచారమే అనిపిస్తాయి. వుహాన్‌ ల్యాబ్‌ పై ఉన్న నెగటివిటీని సెటైరికల్ గా గత నెలలో వీళ్లు రాసిన ఆర్టికల్‌ ఇప్పుడు వైరల్‌ అవుతోంది. వీరు పబ్లిష్ చేసిన వృద్ధుడి ఫొటో చైనా వ్యక్తిదే కాదట. ప్రపంచంలో అత్యంత వృద్ధుడి రికార్డు నెలకొల్పిన జపాన్‌ కు చెందిన వ్యాపారవేత్త యుకిషి చుగంజి. 2003లో 114 ఏళ్ల వయసులో అనారోగ్యంతో చనిపోయారు.