విషాదం: గోదావరిలో స్నానానికి వెళ్లి ఆరుగురి గల్లంతు

నిజామాబాద్ జిల్లాలో విషాదం చోటుచేసుకుంది. గోదావరిలో స్నానం చేయడానికి వెళ్లిన ఆరుగురు గల్లంతయ్యారు. ఇప్పటివరకు వీరిలో ఐదుగురి మృతదేహాలు లభ్యం కాగా, మరొకరి ఆచూకీ కోసం గాలిస్తున్నారు. పోచంపాడు వీఐపీ పుష్కరఘాట్ లో ఈ ప్రమాదం చోటుచేసుకుంది. ఎల్లమ్మగుట్ట డీకంపల్లి, మక్లూర్, నిజామాబాద్ ప్రాంతాలకు చెందిన మూడు కుటుంబాలు శుక్రవారం ఉదయం గోదావరిలో స్నానం చేయడానికి వెళ్లాయి.

ఈ క్రమంలో స్నానాలు చేయడానికి నదిలోకి దిగిన ఇద్దరు చిన్నారులు ప్రమాదవశాత్తు మునిగిపోయారు. వారిని కాపాడేందుకు మరో ఐదుగురు నదిలోకి దిగారు. విషయం తెలుసుకున్న స్థానికులు హుటాహుటిన అక్కడకు వచ్చి ఒక బాలుడిని కాపాడారు. మిగిలిన ఆరుగురు గల్లంతయ్యారు. దీంతో గజఈతగాళ్ల సాయంతో నదిలో గాలించగా.. ఐదుగురు మృతదేహాలు లభ్యమయ్యాయి. మరొకరి కోసం గాలింపు కొనసాగిస్తున్నారు.