‘తెల్లవారితే గురువారం’ రివ్యూ – భరించడం చాలా కష్టం.

‘మత్తు వదలరా’ సినిమా తర్వాత ఎంఎం కీరవాణి తనయుడు శ్రీ సింహ కోడూరి హీరోగా, మణికాంత్ గెల్లి దర్శకుడిగా పరిచయం అవుతూ చేసిన రొమాంటిక్ ఎంటర్టైనర్ ‘తెల్లవారితే గురువారం‘. యంగ్ టైగర్ ఎన్.టి.ఆర్ ప్రీ రిలీజ్ ఫంక్షన్ కి రావడంతో క్రేజ్ తెచ్చుకున్న ఈ సినిమా ఏ మేరకు ప్రేక్షకులను ఎంటర్టైం చేసిందో ఇప్పుడు చూద్దాం..

కథ:

వీరేంద్ర(శ్రీ సింహా కోడూరి) – మధు(మిష నారంగ్)లకి పెద్దలు పెళ్లి కుదురుస్తారు. నైట్ రిసెప్షన్ అవుతుంది, తెల్లవారితే గురువారం పెళ్లి ముహూర్తం అనగా ఇద్దరూ కలిసి పెళ్లి నుంచి పారిపోతారు. అందులో వీరు తను గతంలో ప్రేమించిన అమ్మాయి కృష్ణవేణి(చిత్ర శుక్ల) కోసం పెళ్లి నుంచి బయలుదేరితే, మధు ఏమో పెళ్లి మీద భయంతో పెళ్లి వద్దనుకుంటుంది. ఇలా కలిసి బయలు దేరిన వీరి ప్రయాణం ఎలా జరిగింది? వీరు తాను ప్రేమించిన కృష్ణవేణి దగ్గరికి వెళ్తే ఎదురైన పరిణామాలు ఏంటి? తన దగ్గరే ఉండిపోయాడా? లేక వెనక్కి వచ్చేసాడా? ఈ జర్నీలో వీరు – మధుల మధ్య ఏం జరిగింది? ఫైనల్లీ ఉదయం పెళ్లి జరిగిందా? లేదా? అన్నదే కథ..

తెరమీద స్టార్స్..

శ్రీ సింహా కోడూరి రెండవ సినిమాతో నటనలో పరిపక్వత చూపించాడు. అటు లవ్ సీన్స్, ఇటు కామెడీ సీన్స్ లో మంచి నటనని కనబరిచి ఆడియన్స్ ని ఆకట్టుకుంటాడు. చిత్ర శుక్ల ఉన్నది చాలా తక్కువ సేపైనా కన్ఫ్యూజ్డ్ గర్ల్ పాత్రలో బాగా చేసింది. మిష నారంగ్ మొదటి సినిమా అయినా లుక్స్ పరంగానే కాకుండా నటనతోనూ మెప్పించింది. ఇకపోతే సినిమాకి ప్రధాన హైలైట్ సత్య.. తొందరపాటు అండ్ షార్ట్ టెంపర్ పాత్రలో తన సీన్స్ లో బాగా నవ్విస్తాడు. వైవా హర్ష కూడా అక్కడక్కడా నవ్విస్తాడు. రాజీవ్ కనకాల, అజయ్, శరణ్య ప్రదీప్ లు వారి వారి పాత్రల్లో మెప్పించారు.

తెర వెనుక టాలెంట్..

ట్రై యాంగిల్ రొమాంటిక్ ఎంటర్టైనర్ కి కావాల్సిన బ్యూటీని సురేష్ రగుతు తన విజువల్స్ తో తీసుకొచ్చాడు. ప్రతి సీన్ లో తన ఫ్రేమింగ్ అండ్ లైటింగ్ తో విజువల్ మూడ్ ని క్రియేట్ చేయడంలో తన వర్క్ పరంగా బెస్ట్ ఇచ్చాడు. ఆ విజువల్స్ కి పర్ఫెక్ట్ మ్యూజిక్ అందించి కాల భైరవ వీలైనంతవరకూ సినిమాని నిలబెట్టే ప్రయత్నం చేసాడు. సత్య గిడుతూరి ఎడిటింగ్ ఫస్ట్ హాఫ్ లో పరవాలేధనిపించినా, సెకండాఫ్ లో మాత్రం కొన్ని అనవసరపు లాగ్ సీన్స్ ని కట్ చేసి ఉంటే బాగుండేది అనే ఫీలింగ్ ఇస్తుంది. ఉదాహరణకి అజయ్ ట్రాక్ అసలే సినిమాకి అవసరం లేదు.

ఇక నూతన దర్శకుడు మణికాంత్ గెల్లి తీసుకున్న ట్రై యాంగిల్ లవ్ స్టోరీ పాయింట్ ని అడపాదపా చూసే ఉన్నాం. కానీ సందర్భానుసారంగా వచ్చే కామెడీతో సినిమాని నడిపించాలి అనుకున్నాడు. అనుకున్న దాని ప్రకారం సినిమా ప్రారంభం బాగుంది, పాటలకి పెట్టిన సమస్య బాగుంది, మొదటి అర్ధ భాగంలో కొన్ని మోమెంట్స్ తో కాసేపు బాగుంది, కాసేపు బోరింగ్ అంటూ లాగించేసిన ఓకే పర్లేదులే అనే ఫీలింగ్ వస్తుంది. కానీ కథకి కీలకమైన సెకండాఫ్ లో మాత్రం పాత్రలకి సరైన జస్టిఫికేషన్ లేదు. సింహా – మిషలని కలపడానికి రాసుకున్న ఎమోషనల్ సీన్స్ లో లాజిక్ గానీ, మేజిక్ గానీ ఏదీ ఉండదు. దీనికితోడు అనవసరపు సీన్స్ తో సాగదీత అవ్వడం వలన బాగా స్లోగా సాగుతుంది. స్క్రీన్ ప్లే అనేది ఈ సినిమాకి బిగ్గెస్ట్ మైనస్ ఎందుకంటే 2 గంటల సినిమానే అయినా 4 గంటలు చుసిన ఫీలింగ్ వస్తుంది. డైరెక్టర్ మణికాంత్ అందరికీ తెలిసిన కథని ఎంగేజింగ్ గా చెప్పడంలో ఫెయిల్ అయ్యాడు. నిర్మాణ విలువలు బాగున్నాయి.

విజిల్ మోమెంట్స్:

– శ్రీ సింహా కోడూరి నటన
– నవ్వించే సత్య కామెడీ సీన్స్
– విజువల్స్ అండ్ మ్యూజిక్

బోరింగ్ మోమెంట్స్:

– రొటీన్ పంథాలో అనిపించే కథ
– సెకండాఫ్ కథనం
– అనవసరపు సీన్స్ తో సాగదీత
– స్లో నేరేషన్
– ఎమోషనల్ జస్టిఫికేషన్ లేకపోవడం
– వీక్ క్లైమాక్స్

విశ్లేషణ:

ట్రైలర్ చూసి ‘తెల్లవారితే గురువారం’ ఓ కామెడీ రైడ్ అనుకుంటారు, కానీ సినిమా చూసాక ఇదొక బోరింగ్ రైడ్ అని తలలు పట్టుకుంటారు. పాత్రలు, ప్రారంభం బాగున్నా అనుకున్న కథని, ఎమోషన్స్ ని సరిగా రీచ్ చేయలేకపోవడం వలన చూసే ఆడియన్స్ కి నీరసం తెప్పిస్తుంది. సరికొత్త కథలని ట్రై చేస్తున్న టైంలో ఒక యంగ్ టీం ఇలాంటి సినిమాని అటెంప్ట్ చేయడం బాధాకరం.

చూడాలా? వద్దా?: పిచ్చ లైట్ తీసుకోవచ్చు.

తెలుగుబులెటిన్. కామ్ రేటింగ్: 1.5/5