దుర్గంచెరువు కేబుల్‌ బ్రిడ్జి ప్రారంభం

భాగ్యనగరం సిగలో మరో మణిహారంగా నిలిచే దుర్గంచెరువు కేబుల్‌ బ్రిడ్జి అందుబాటులోకి వచ్చింది. కేంద్రమంత్రి కిషన్‌రెడ్డితో కలిసి రాష్ట్ర పురపాలక శాఖ మంత్రి కేటీఆర్‌ దీన్ని ప్రారంభించారు. ఈ వంతెన అందుబాటులోకి రావడంతో హైదరాబాద్‌కు ప్రత్యేక ఆకర్షణతోపాటు మాదాపూర్‌, జూబ్లీహిల్స్‌ మధ్య ట్రాఫిక్‌ ఇబ్బందులు తగ్గనున్నాయి.

దుర్గంచెరువుపై నిర్మించిన ఈ వంతెన దేశంలోనే అతిపెద్ద కేబుల్‌ బ్రిడ్జిగా రూపుదిద్దుకుంది. ఎల్‌ఈడీ లైట్ల వెలుగుల్లో వంతెన అందాలు కనువిందు చేస్తున్నాయి.

రూ.184 కోట్ల వ్యయంతో 754.38 మీటర్ల పొడవున ఈ వంతెనను నిర్మించారు. దుర్గం చెరువుకు ఇరువైపులా 20 మీటర్ల ఎత్తులో వంతెనను పూర్తి చేశారు. దుర్గం చెరువు పరిసరాల్లో పర్యావరణం దెబ్బతినకుండా కేవలం రెండు పిల్లర్లపై ఈ వంతెనను ఎల్‌అండ్‌టీ సంస్థ నిర్మించింది.

ఈ వంతెన ప్రారంభం కావడంతో జూబ్లీహిల్స్‌ నుంచి మైండ్‌స్పేస్‌, గచ్చిబౌలికి దాదాపు 2 కి.మీ మేర దూరం తగ్గనుంది. బ్రిడ్జికి ఎల్‌ఈడీ లైట్లు ప్రత్యేక ఆకర్షణగా నిలవనున్నాయి. దీనిపై మొత్తం 40వేల ఎల్‌ఈడీ లైట్లను అమర్చారు. దుర్గం చెరువును ప్రభుత్వం పర్యాటకంగానూ అభివృద్ధి చేస్తోంది.

ఈ బ్రిడ్జిపైకి ప్రతి శని, ఆదివారాల్లో వాహనాలను అనుమతించరు. వారాంతాల్లో కేవలం పర్యాటకులకు మాత్రమే కాలినడకన అనుమతిస్తామని జీహెచ్‌ఎంసీ స్పష్టం చేసింది.