పుష్ప అప్‌డేట్‌: విజయ్‌ సేతుపతి ప్లేస్‌లో రంగస్థలం నటుడు?

అల్లు అర్జున్‌ హీరోగా రష్మిక మందన్న హీరోయిన్‌గా సుకుమార్‌ దర్శకత్వంలో మైత్రి మూవీ మేకర్స్‌ నిర్మిస్తున్న పుష్ప చిత్రం షూటింగ్‌ ప్రారంభంకు ఇంకాస్త సమయం పట్టే అవకాశం ఉంది. గత ఏడాదిలోనే సినిమాను ప్రారంభిస్తామంటూ దర్శకుడు సుకుమార్‌ తమిళ స్టార్‌ విజయ్‌సేతుపతి డేట్లు తీసుకున్నాడు. కాని కొన్ని కారణాల వల్ల సినిమా ఆలస్యం అవుతూ వచ్చింది. ఇప్పుడు లాక్‌డౌన్‌ కారణంగా షూటింగ్‌ జరగడం లేదు. కరోనా భయం తగ్గిన తర్వాత షూటింగ్‌కు వెళ్లే అవకాశాలు ఉన్నాయి.

పుష్ప చిత్రం కోసం డేట్లు ఇచ్చిన విజయ్‌ సేతుపతి వచ్చే ఏడాది ఆరంభంలో మరో సినిమాను చేయాల్సి ఉంది కనుక తప్పుకుంటున్నట్లుగా ప్రకటించాడట. సినిమాను వచ్చే ఏడాదిలో సుకుమార్‌ రూపొందించనున్న నేపథ్యంలో విజయ్‌ సేతుపతి స్థానంలో ఆది పినిశెట్టిని ఎంపిక చేసినట్లుగా తెలుస్తోంది. రంగస్థలం చిత్రంలో రామ్‌ చరణ్‌ అన్న పాత్రలో ఆది నటించాడు. ఆ సినిమాలో ఆది నటనకు మరియు పాత్రకు మంచి పేరు దక్కింది. అందుకే పుష్ప చిత్రంలో నటించాలని ఆది నిర్ణయించుకున్నాడు.

భారీ అంచనాలున్న పుష్ప చిత్రంలో విలన్‌ పాత్రకు గాను బాలీవుడ్‌ నటుడిని సంప్రదించబోతున్నారు. ఇక ఆది ఈ చిత్రంలో పోలీస్‌ ఆఫీసర్‌గా కనిపిస్తాడనే టాక్‌ వినిపిస్తుంది. విజయ్‌ సేతపతి పాత్రను ఆది రిప్లేస్‌ చేయగలడా అంటూ అప్పుడే కొందరు అనుమానాలు వ్యక్తం చేస్తున్నారు. అయితే సుకుమార్‌ ఎలాంటి నటుడి నుండి అయినా అద్బుతాన్ని ఆవిష్కరిస్తాడు. ఆయన గత సినిమాలు ఈ విషయాన్ని చూపిస్తున్నాయి. అందుకే పుష్పలో ఆదికి మరో మంచి ఛాన్స్‌ దక్కినట్లయ్యింది.