ఇన్‌సైడ్‌ స్టోరీ: జర్నలిజం కాదది బానిసత్వం.!

మీడియా అంటే ప్రజల పక్షాన నిలబడాలి. అధికారంలో వున్నవాళ్ళు ప్రజలకు ఎంత గొప్ప పాలన అందించినా, ‘ఇంకాస్త చేసి వుంటే బావుండేది’ అని మీడియా, ప్రజల తరఫున డిమాండ్‌ చేయాల్సిందే. విపక్షాలు చేసే విమర్శల్లో అర్థం వున్నా, లేకపోయినా.. కాస్తో కూస్తో విపక్షాల తరఫున మాట్లాడి, ప్రభుత్వాన్ని ప్రశ్నించగలిగితేనే అది మీడియా అవుతుంది. కానీ, గత కొంకాలంగా మీడియా ‘నైతిక విలువలకు’ తిలోదకాలిచ్చేసిన మాట వాస్తవం.

అధికార పార్టీలకు ‘బాకా ఊదడం’ మొదలయ్యాక, ఓ సెక్షన్‌ మీడియా ప్రజల్ని పట్టించుకోవడమే మానేసింది. ఎంతసేపూ అధికార పార్టీ భజన తప్ప, ఇంకో ఆలోచనే మీడియాకి వుండడంలేదన్న విమర్శ కొన్ని మీడియా సంస్థల మీద విన్పిస్తోంది. గతంలో ఎల్లో మీడియా గురించి మాట్లాడుకున్నాం.. ఇప్పుడు బ్లూ మీడియా గురించి మాట్లాడుకుంటున్నాం. అంతే తేడా.

జర్నలిజంలో ఎంతో ఉన్నత స్థానానికి ఎదిగిన కొందరు, ‘నామినేటెడ్‌ పదవుల కోసం’ పడుతున్న కక్కుర్తి కారణంగా, మీడియాలో విలువలు మరింత పతనమైపోతున్నాయి. ఓ సీనియర్‌ జర్నలిస్ట్‌, అధికార పార్టీకి వత్తాసు పలికే మీడియా సంస్థలో పనిచేస్తున్నారు. విశాఖలో గ్యాస్‌ లీకేజీ ఘటన జరిగి 12 మంది ప్రాణాలు కోల్పోతే, ‘అది ప్రాణాలు తీసేంత ప్రమాదకరమైన విషవాయువు కాదట కదా..’ అంటూ చర్చా కార్యక్రమంలో వెకిలి వ్యాఖ్యలు చేశారా జర్నలిస్ట్‌.

తాజాగా, ‘ముఖ్యమంత్రి, బాధితులకు కోటి ఇచ్చారు. అంత పెద్ద అమౌంట్‌ ప్రకటించినా ముఖ్యమంత్రిని విమర్శిస్తారా.?’ అంటూ ఊగిపోయారాయన. కోటి రూపాయలు ముఖ్యమంత్రి ప్రకటించిన దరిమిలా, ఆ ప్రకటనను ఆహ్వానించాల్సిందే. అదే సమయంలో, ఇంకో కోటి రూపాయలు బాధిత కుటుంబాలకు వస్తే బావుండేదని మీడియా, ప్రజల తరఫున నినదించడమే కదా సామాజిక బాధ్యత. పైగా, ‘మాకు డబ్బులొద్దు.. మా కుటుంబ సభ్యుల ప్రాణాలకు వెల కడ్తారా.? మమ్మల్ని నాశనం చేస్తోన్న ఫ్యాక్టరీని మూసేసి, ఇక్కడి నుంచి తరలిస్తామని హామీ ఇవ్వండి..’ అంటూ జనం నిలదీస్తోంటే, ఆ ప్రజల్ని అవమానించడమేంటి.?

న్యూస్‌ ఛానళ్ళు, పత్రికలే కాదు, వెబ్‌ మీడియా కూడా ‘బానిసత్వానికి’ అలవాటుపడిపోతే, ప్రజల తరఫున ప్రశ్నించేదెవరు.?