‘బాయ్స్‌ రూమ్’లో అసలేం జరిగిందంటే..

‘బాయ్స్‌ రూమ్’.. ఇప్పుడు దేశాన్ని కుదిపేస్తోన్న అంశమిది. కరోనా వైరస్‌ కంటే అత్యంత ప్రమాదకరమైన విషయంగా దీన్ని పరిగణిస్తున్నారు చాలామంది విద్యార్థుల తల్లిదండ్రులు. ఓ సోషల్‌ మీడియా ప్లాట్‌ఫామ్ పై ‘సెక్సువల్‌ అసాల్ట్‌’కి సంబంధించిన చర్చ, విద్యార్థుల మధ్య జరిగింది. ఈ క్రమంలో ఓ విద్యార్థి పేరు తెరపైకొచ్చింది. అంతే, ఆ విద్యార్థి అవమాన భారం భరించలేక బలవన్మరణానికి పాల్పడ్డాడు.

అసలు విషయాన్ని ఆరా తీస్తే, సభ్య సమాజం సిగ్గుతో తలదించుకునే విషయం వెలుగు చూసింది. ఓ బాలిక, బాలుడి పేరుతో ఛాట్‌ సెషన్‌ని స్టార్ట్‌ చేసింది. అందులో పలువురు విద్యార్థులు పాల్గొన్నారు. ‘సెక్సువల్‌ అస్సాల్ట్‌’ అంటే లైంగిక వేధింపులకు ఎలా పాల్పడతారు.? ఎలా రేప్‌ చేస్తారు.? వంటి అంశాలపై ప్రశ్నలు, సమాధానాలు, ఫాంటసీలు.. అబ్బో పెద్ద కథే నడిచింది. ‘అబ్బాయిలు చెడిపోతున్నారు.. వారిని తల్లిదండ్రులు అదుపు చేయడంలేదు.. ఇలాంటివారి వల్లనే దేశం చెడిపోతుంది..’ అంటూ తొలుత ‘సోకాల్డ్‌ మేధావి వర్గం’ నోరు పారేసుకుంది.

చివరికి, దీనంతటికీ కారణం ఓ అమ్మాయి అని తేలేసరికి అంతా ముక్కున వేలేసుకుంటున్నారు.. సోకాల్డ్‌ మేధావి వర్గం అయితే, ఒక్కసారిగా అజ్ఞాతంలోకి వెళ్ళిపోయింది. నేరం ఎవరు చేసినా అది నేరమే. ఎవరు నేరం చేశారు.? అన్నది తేలకుండా, అబ్బాయి కాబట్టి నిందించడం మొదలు పెడితే ఇలాగే వుంటుంది. ఓ తల్లి తన బిడ్డను కోల్పోయిందిప్పుడు. ఆ తల్లికి సమాధానం చెప్పేదెవరు.? తప్పు జరిగిపోయింది.. కాదు కాదు, పెద్ద నేరమే జరిగిపోయింది.

పిల్లల్లో ఈ తరహా పెడధోరణలు ఎందుకు పుట్టుకొస్తున్నాయి.? అంటే, మనల్ని మనం నిందించుకోక తప్పదు. ఇంటర్నెట్‌ విచ్చలవిడిగా అందుబాటులోకి వచ్చేశాక, ఎవర్నీ కంట్రోల్‌ చేసే పరిస్థితి లేదు. ఆన్‌లైన్‌ క్లాసులు, ఇంకోటి.. వెరసి, ఇంటర్నెట్‌ని రకరకాలుగా పిల్లలు వాడేందుకు ఆస్కారమేర్పడుతోంది. ఒక్కసారి ఇంటర్నెట్‌లోకి ఎంటర్‌ అయితే, అంతా వాళ్ళిష్టమే. పిల్లల్ని అదుపు చేయడం తల్లిదండ్రులకి కష్టమే.