కమలం, ఫ్యాను మధ్య సంధి కుదిరిందా?

ప్రపంచాన్ని కరోనా కుమ్మేస్తున్న సమయంలోనూ ఏపీలో మాత్రం హాట్ హాట్ రాజకీయాలు సాగుతున్నాయి. అధికార, ప్రతిపక్ష పార్టీల మధ్య ఆరోపణల పర్వం కొనసాగుతోంది. ఓ దశలో తెలుగుదేశం పార్టీ కంటే బీజేపీనే అధికార వైసీపీపై విరుచుకుపడింది. కరోనా టెస్టు కిట్ల కొనుగోలులో గోల్ మాల్ జరిగిందంటూ బీజేపీ రాష్ట్ర అధ్యక్షుడు కన్నా లక్ష్మీనారాయణ ఆరోపణలు చేశారు. దీనికి వైసీపీ ఎంపీ విజయసాయిరెడ్డి ధీటుగా కౌంటరిచ్చారు.

సుజనా చౌదరికి కన్నా రూ.20 కోట్లకు అమ్ముడుపోయారని, ఎన్నికల సమయంలో బీజేపీ అధిష్టానం పంపించిన సొమ్మును నొక్కేశారని తీవ్ర ఆరోపణలు చేశారు. దీంతో కన్నా సైతం ధీటుగా స్పందిస్తూ.. విజయసాయిరెడ్డిని జైలు పక్షి అని, దమ్ముంటే కాణిపాకంలో ప్రమాణం చేస్తారా అని సవాల్ చేశారు. దీనికి సాయిరెడ్డి సానుకూలంగానే స్పందించారు. కాణిపాకం ఎప్పుడు వస్తారంటూ ప్రశ్నించారు. ఇలా వైసీపీ, బీజేపీ మధ్య రెండు మూడు రోజులపాటు సాగిన వాగ్యుద్ధం ఒక్కసారిగా చల్లబడింది.

అసలు తమ మధ్య ఎలాంటి విమర్శలు జరగలేదు అనేంతగా ఇరువర్గాలూ సైలెంటయిపోయాయి. ఇందుకు ప్రధాన కారణం బీజేపీ అధిష్టానం కన్నా ఎపిసోడ్ ని లైట్ తీసుకోవడమేననే గుసగుసలు వినిపిస్తున్నాయి. సాయిరెడ్డి చేసిన ఆరోపణలను కన్నా తమ పార్టీ అధిష్టానం దృష్టికి తీసుకెళ్లారు. అయితే, అక్కడ నుంచి సరైన స్పందన రాలేదని తెలుస్తోంది.

వైసీపీ ట్రాప్ లో పడకుండా కరోనాపై అందరం కలిసికట్టుగా పోరాడాలని సూచించినట్టు సమాచారం. ఇప్పటికే రాష్ట్ర బీజేపీ స్టాండ్ ఏమిటనేది ఎవరికీ అంతుబట్టని విషయంగా మారిపోయింది. పార్టీలోని కొందరు టీడీపీ అనుకూలంగా వ్యవహరిస్తుండగా.. మరికొంతమంది వైసీపీ సానుకూల వైఖరి అవలంభిస్తున్నారు. అసలు ఢిల్లీ పెద్దల వైఖరి ఏమిటనేది కూడా ఎవరికీ తెలియడంలేదు.

సాయిరెడ్డి తమ పార్టీ నేతలపై తీవ్ర ఆరోపణలు చేసినా.. ఒక్కరు కూడా వాటిని ఖండించలేదు. దీంతో వైసీపీకి, బీజేపీ పెద్దలకు మధ్య సత్సంబంధాలు ఉండి ఉంటాయనే భావన రాష్ట్ర బీజేపీ నేతల్లో బలపడుతోంది. దీంతోనే కన్నా ఎపిసోడ్ ను పక్కన పెట్టేశారనే ప్రచారం సాగుతోంది. మరోవైపు కన్నా సైతం తత్వం బోధపడి ఆ ఎపిసోడ్ కు ముగింపు పలికినట్టుగా తెలుస్తోంది. అందువల్లే ఈ వ్యవహారం ప్రస్తుతానికి చల్లబడింది.