పరీక్షలు పెంచాల్సిందేనా?

‘తెలంగాణలో కరోనా కేసులు తగ్గుతున్నాయి. లాక్ డౌన్ ను పకడ్బందీగా అమలు చేస్తుండటం వల్లే ఈ ఫలితం సాధించగలిగాం. ప్రజలు మరికొంత కాలం సహకరిస్తే పూర్తిగా ఈ మహమ్మారి నుంచి బయటపడొచ్చు’ – ఇదీ సీఎం కేసీఆర్ ఆదివారం ప్రజలకు చేసిన వినతి.

నిజంగా ఇది మంచి పరిణామమే. రాష్ట్రంలో కేసుల సంఖ్య క్రమంగా తగ్గుతోంది. పల్లెల్లో లాక్ డౌన్ వంద శాతం పక్కాగా అమలవుతోంది. కానీ నగరాలు, పట్టణాల్లో మాత్రం ఉల్లంఘనలు సాగుతున్నాయి. ముఖ్యంగా హైదరాబాద్ లో అయితే ఇవీ మరీ ఎక్కువ. తాజాగా నమోదవుతున్న కేసులు కూడా జీహెచ్ఎంసీ పరిధిలోనివే కావడం గమనార్హం. మరోవైపు లాక్ డౌన్ అమలు విషయంలో ఎంతో కట్టుదిట్టంగా వ్యవహరిస్తున్న తెలంగాణ సర్కారు.. కరోనా నిర్ధారణ పరీక్షల విషయంలో మాత్రం అలా వ్యవహరించడంలేదు.

తెలంగాణ మొత్తంగా ఇప్పటివరకు 18,756 పరీక్షలు మాత్రమే చేశారు. సాధారణంగా కరోనా లక్షణాలు ఉన్నవారికి, పాజిటివ్ వ్యక్తులతో కాంటాక్ట్ అయినవారికి ఈ పరీక్షలు నిర్వహిస్తే చాలు. కానీ జిత్తులమారి కరోనా ఎప్పటికప్పుడు తన రూపాన్ని మార్చుకుంటోంది. పరిస్థితులకు తగినట్టుగా తనను తాను అప్ గ్రేడ్ చేసుకుంటోంది. లక్షణాలు లేనివారికి కూడా పాజిటివ్ వస్తోంది.

మహారాష్ట్రలో దాదాపు 80 శాతం మంది కరోనా పాజిటివ్ వచ్చిన వ్యక్తుల్లో ఎలాంటి లక్షణాలూ లేవు. తెలంగాణలో సైతం ఇలాంటి కేసులు వెలుగు చూశాయి. ఈ నేపథ్యంలో ఎంత ఎక్కువ మందికి కరోనా నిర్ధారణ పరీక్షలు చేస్తే అంత మంచిది. కాంటాక్ట్ కేసులు, వారికి సన్నిహితంగా ఉన్నవారితోపాటు ర్యాండమ్ గా ఈ పరీక్షలు చేయడం వల్ల దాగి ఉన్న వైరస్ కేసులను వెలికి తీయొచ్చని చెబుతున్నారు. ఒకవేళ అలా చేయకుంటే లక్షణాలు కనిపించని వ్యక్తుల ద్వారా మరింత మందికి వైరస్ సోకే ప్రమాదం ఉందని పేర్కొంటున్నారు.

ఒక్క కేసు కూడా నమోదు కాని రోజు నుంచి కనీసం 20 రోజులపాటు పకడ్బందీగా లాక్ డౌన్ అమలు చేసినప్పుడే ఈ మహమ్మారిని నిరోధించగలుగుతామని వైద్య నిపుణులు చెబుతున్నారు. వేసవి ఎండలకు ఈ వైరస్ మనలేదని తొలుత వార్తలు వచ్చినా.. ఇప్పుడు ఆ ఆశ కూడా లేదని వివరిస్తున్నారు. ఈ వైరస్ మరింత శక్తివంతమైందని, 92 డిగ్రీల వేడి వద్ద 15 నిమిషాలపాటు ఇది బతుకుతోందని తాజా పరిశోధనలో వెల్లడైందని పేర్కొంటున్నారు. ఈ నేపథ్యంలో లాక్ డౌన్ పక్కాగా పాటించడంతోపాటు వ్యక్తిగత పరిశుభ్రత పాటించడం ఆవశ్యకమని స్పష్టంచేస్తున్నారు.