లాక్‌ డౌన్‌ ముగిసినా సంక్షోభం మాత్రం కొనసాగడం తప్పదా?

కరోనా కారణంగా ప్రపంచ వ్యాప్తంగా పలు పరిశ్రమలు తీవ్ర సంక్షోభంను ఎదుర్కొంటున్నాయి. మన దేశంలో లాక్‌ డౌన్‌ కారణంగా సినిమా పరిశ్రమ పూర్తిగా స్థంభించి పోయింది. షూటింగ్స్‌ లేకపోవడంతో కార్మికులు, సెలబ్రెటీలు, టెక్నీషియన్స్‌ ఇలా ప్రతి ఒక్కరు కూడా ఖాళీగానే ఉన్నారు. ఇక థియేటర్ల యాజమాన్యాలు, అందులో పని చేసే వారి పరిస్థితి దారుణంగా ఉంది. లాక్‌ డౌన్‌ ఎత్తివేసిన వెంటనే షూటింగ్స్‌ ప్రారంభం అవుతాయేమో కాని థియేటర్లు మాత్రం ప్రారంభం అయ్యే పరిస్థితి కనిపించడం లేదు.

సినీ విశ్లేషకుల అంచనా ప్రకారం థియేటర్లు పూర్తి స్థాయిలో గతంలో మాదిరిగా రన్‌ అవ్వాలంటే ప్రేక్షకులు పూర్తి నమ్మకంగా థియేటర్లకు రావాలి అంటూ కనీసం ఆరు నెలల సమయం అయినా పడుతుందని అంటున్నారు. ఈ సమయంలో థియేటర్లు గడ్డు పరిస్థితిని ఎదుర్కోవాల్సి రావచ్చు అంటున్నారు. థియేటర్లకు ప్రేక్షకులు వచ్చే పరిస్థితి ఎలాగూ లేదు కనుక ఖచ్చితంగా సినిమాలు కూడా విడుదల అయ్యే అవకాశం లేదు. సినిమాల విడుదల ఉండక పోతే షూటింగ్స్‌ కూడా మందకోడిగా సాగుతాయి.

షూటింగ్స్‌ తక్కువగా ఉంటే మళ్లీ సినీ కార్మికులు రోజు వారిగా జీతానికి చేసే టెక్నీషియన్స్‌ కూడా తీవ్ర అవస్థలు పడాల్సి వస్తుందని విశ్లేషకులు అభిప్రాయం వ్యక్తం చేస్తున్నారు. లాక్‌ డౌన్‌ ఎత్తి వేసిన తర్వాత కూడా సంక్షోభం కొనసాగడం ఖాయం అన్నట్లుగా విశ్లేషకులు ఆందోళన వ్యక్తం చేస్తున్నారు. సినిమా పరిశ్రమ మునుపటి జోరును కొనసాగించాలంటే ఆరు నెలలు లేదా అంతకు మించే పట్టవచ్చు అంటున్నారు. కేవలం టాలీవుడ్‌ కు మాత్రమే కాకుండా అన్ని భాషల పరిశ్రమలకు కూడా ఇదే పరిస్థితి ఉండనుంది.

హిందీ సినిమాల బడ్జెట్‌ చాలా వరకు తగ్గనుందని ఇప్పటికే ఒక బాలీవుడ్‌ ఫిల్మ్‌ మేకర్‌ ప్రకటించాడు. అలాగే తెలుగు సినిమాల నిర్మాతలు కూడా కాస్ట్‌ కట్టింగ్‌ కు వెళ్తారని, హీరోల పారితోషికాల విషయంలో విప్లవాత్మక మార్పులు వస్తాయనిపిస్తుంది. మొత్తానికి ఖచ్చితంగా కరోనా ప్రభావం ఆరు నెలలకు పైగానే ఉంటుందనిపిస్తుంది.