ప్రపంచాన్ని వణికిస్తున్న కరోనా వైరస్ ఇప్పుడే పుట్టింది కాదని, ఏడేళ్ల క్రితమే ఇది వెలుగు చూసిందని, అది కూడా లండన్ లో అని ఒక వార్త సోషల్ మీడియాలో చక్కర్లు కొడుతోంది. ఇందుకు రుజువుగా 2013 ఫిబ్రవరి 20న ఈనాడు పత్రికలో వచ్చిన ఓ వార్త క్లిప్పింగ్ ను కూడా జతపరిచారు. ఇది నిజమేనా.. లేక ఫేక్ న్యూసా అనే చర్చ సాగుతోంది.
ఆ వార్త నిజమైందే. ఫేక్ కాదు. అలాంటప్పుడు ఈ వైరస్ చైనాలో పుట్టలేదా? ఏడేళ్ల క్రితమే లండన్ లో వెలుగుచూసిందా? అయితే, ప్రపంచం మొత్తం చైనాను ఎందుకు ఆడిపోసుకుంటున్నారనే ప్రశ్నలు ఉదయించడం సహజం. ఇందులో నిజమేమిటంటే.. ఏడేళ్ల క్రితం లండన్ లో కనిపించిన వైరస్ వేరు.. ఇప్పుడు ప్రపంచాన్ని గడగడలాడిస్తున్న వైరస్ వేరు.
వివరంగా చెప్పాలంటే.. ఒకే కుటుంబానికి చెందిన ఇద్దరు వేర్వేరు వ్యక్తులన్నమాట. ఏడేళ్ల క్రితం వెలుగుచూసింది నోవెల్ కరోనా వైరస్. ఇప్పుడు వచ్చిన వైరస్.. అదే గ్రూపునకు చెందిన శక్తివంతమైన వైరస్. దీని పేరు కోవిడ్-19. కానీ తొలుత ఈ వైరస్ ను కరోనా వైరస్ అని పిలవడంతో తర్వాత దీని పేరు కోవిడ్-19 అని చెప్పినా.. జనానికి కరోనా అనే పదమే బాగా గుర్తుండిపోవడంతో అదే పేరు కొనసాగుతోంది.
ఈ నేపథ్యంలో చైనాకు అనుకూలంగా వ్యవహరించే కొంతమంది వ్యక్తులు సోషల్ మీడియాలో ఈ పాత క్లిప్పింగ్ ను తీసుకొచ్చి ప్రచారం ప్రారంభించారు. ఇది చైనాలో పుట్టిన వైరస్ కాదు అని చెప్పాలన్నదే వారి తాపత్రయంగా కనిపిస్తోంది. కానీ కోవిడ్-19 పుట్టింది మాత్రం కచ్చితంగా చైనాలోని వూహాన్ లోనే అని ప్రపంచం మొత్తం నమ్ముతోంది.