3 రాజధానులు.. వైఎస్‌ జగన్‌కి ‘ముప్పు’ తప్పదా.?

దేశంలో ఏ రాష్ట్రానికీ మూడు రాజధానులు లేవు. ఆ మాటకొస్తే, భారతదేశానికి ఢిల్లీ మాత్రమే ఏకైక రాజధాని. అలాంటిది, అతి చిన్న రాష్ట్రాల్లో ఒకటైన ఆంధ్రప్రదేశ్‌కి మూడు రాజధానులు ఎందుకు.? ఈ మాత్రం ఇంగితం లేకుండా పోయింది ఆంధ్రప్రదేశ్‌లో అధికార వైఎస్సార్‌ కాంగ్రెస్‌ పార్టీకి.

‘మూడు రాజధానులతోనే రాష్ట్రాభివృద్ధి..’ అంటూ వైసీపీ నేతలు పైకి చెబుతున్నా, తెరవెనుకాల వ్యవహారం వేరేలా వుంది. నిజానికి వైసీపీలో చాలామందికి మూడు రాజధానుల ప్రతిపాదన నచ్చలేదు. ఈ విషయాన్ని ఇప్పుడిప్పుడే వైసీపీకి చెందిన నేతలు చెప్పుకొస్తున్నారు.

మాజీ మంత్రి వసంత నాగేశ్వరరావు, మూడు రాజధానుల పట్ల తన అసంతృప్తిని ఓ సందర్భంలో వెల్లడించారు. తన కుమారుడు వసంత కృష్ణ ప్రసాద్‌, మూడు రాజధానులపై అసంతృప్తిని నేరుగా ముఖ్యమంత్రి వైఎస్‌ జగన్‌ దృష్టికే తీసుకెళ్ళాడని వసంత నాగేశ్వరావు వ్యాఖ్యానించడం సంచలనంగా మారింది. అయితే, తానిప్పుడు ప్రత్యక్ష రాజకీయాలకు దూరంగా వున్నానని వసంత నాగేశ్వరరావు చెప్పడం గమనార్హం.

అమరావతిని శాసన రాజధానిగా మార్చుతూ, విశాఖకి అడ్మినిస్ట్రేటివ్‌ క్యాపిటల్‌ హోదాని ఇచ్చి, కర్నూలుని జ్యుడీషియల్‌ రాజధానిని చేయాలన్నది వైఎస్‌ జగన్‌ ఆలోచన. అయితే, వైసీపీ ఎమ్మెల్యే రోజా ఆ మధ్య ‘అమరావతిలో శాసన సభ వుండాలా.? వద్దా.?’ అంటూ బెదిరింపులకు దిగిన విషయాన్ని ఇక్కడ ప్రస్తావించుకోవాలి.

పరిపాలన అంటే.. మరీ చులకనైపోయింది అధికార పక్షానికి. లేకపోతే, ఏపీఐఐసీ ఛైర్‌పర్సన్‌గా కూడా పనిచేస్తోన్న ఎమ్మెల్యే రోజా, అమరావతి ప్రాంత ప్రజల్ని బ్లాక్‌మెయిల్‌ చేసేలా ‘శాసన సభ వుండలా.? వద్దా.?’ అని ప్రశ్నించడమేంటి.? ఇక్కడ ఒక్కటి మాత్రం నిజం. పార్టీలో ఎమ్మెల్యేల అభిప్రాయాలకి విలువ లేకుండా పోయింది. అధినేత తీసుకున్న నిర్ణయాన్ని పార్టీ నేతలు తమకు ఇష్టం వున్నా లేకున్నా భరించాల్సిన దుస్థితి ఏర్పడింది.

అయితే, ఎక్కువకాలం ఇలా నేతల నోళ్ళను కట్టేయడం సాధ్యం కాదు ఏ రాజకీయ పార్టీకి అయినా. ఒక్కసారి, పార్టీ అధినేత పట్ల వ్యతిరేక గళం బయటకొస్తే.. ఇక, ఆ తర్వాత అదో ఉప్పెనగా మారి, అధికార పార్టీ కొంపు ముంచేయడం ఖాయం. ఆ రోజు ఎంతో దూరం లేదని ప్రతిపక్షం భావిస్తోంది. ప్రతిపక్షమే కాదు, వైసీపీలోనూ ఈ అభిప్రాయం వుందనే విషయం ఇప్పుడిప్పుడే అర్థమవుతోంది అందరికీ.