పథకాలు, ప్రతీకారం.. ఇదే జగన్ అజెండా

ఏపీ రాజకీయాలు వార్తల్లో ఉంటున్నట్టుగా మరే రాష్ట్ర రాజకీయాలూ కనిపించవు. వైఎస్సార్ సీపీ, టీడీపీ మధ్య సాగుతున్న యుద్ధం రోజురోజుకూ ముదురుతోంది. చంద్రబాబు అధికారంలో ఉన్నప్పుడు జగన్ ను ఎన్ని రకాలుగా ఇబ్బందులు పెట్టాలో అన్ని రకాలుగానూ ఇబ్బంది పెట్టారు. ఇప్పుడు అధికారం జగన్ చేతికి రావడంతో ప్రతీకారం తీర్చుకునే పనిలో పడ్డారు.

ఆయన గద్దెనెక్కి తొమ్మిది నెలలు పూర్తవుతోంది. ఈ తొమ్మిది నెలల్లో చాలా పరిణామాలు చోటుచేసుకున్నాయి. ఓ వైపు సంక్షేమ పథకాల అమలుపై దృష్టి సారిస్తూనే.. మరోవైపు చంద్రబాబును ఫిక్స్ చేసే పనిలో నిమగ్నమయ్యారు. బాబును ఇరికించడానికి అవకాశం ఉన్న ఏ ఒక్క అవకాశాన్నీ జగన్ వదులుకోవడంలేదు.

బాబుతోపాటు టీడీపీ కీలక నేతలు ఎక్కడ దొరుకుతారో అని సమగ్రంగా పరిశోధిస్తున్నారు. ఈ క్రమంలోనే రాజధాని ప్రాంతంలో ఇన్ సైడర్ ట్రేడింగ్ తో పాటు తాజాగా ఈఎస్ఐ కుంభకోణం బయటపడింది. ఇదే తరహాలో చంద్రబాబు హాయంలోని కీలక నిర్ణయాలన్నింటినీ పరిశీలించి అవకతవకలు ఉన్నాయేమో నిర్ధారించేందుకు సిట్ కూడా ఏర్పాటు చేశారు. ఇలా సంక్షేమ పథకాల అమలు, చంద్రబాబు పై ప్రతీకారం అనే రెండు అంశాల అజెండాతోనే ముందుకెళ్తున్నారు. అంతిమంగా ఇది రాష్ట్ర అభివృద్ధిపై తీవ్ర ప్రభావం చూపిస్తుందని పలువురు హెచ్చరిస్తున్నారు.

ఇప్పటికే రాష్ట్రంలో అభివృద్ధి పూర్తిగా మందగించిందని, పెట్టుబడులు పెట్టడానికి ఒక్క కంపెనీ కూడా ముందుకు రావడంలేదని పేర్కొంటున్నారు. ఇదే ఒరవడి కొనసాగితే రాష్ట్ర భవిష్యత్తు అంధకారంలోకి వెళ్లడం ఖాయమని, ఇప్పటికైనా జగన్ సర్కారు తగిన చర్యలు తీసుకోవాలని సూచిస్తున్నారు. సంక్షేమ పథకాలు అమలు చేయాలన్నా.. రాష్ట్ర ఆదాయం పెరగాల్సిన అవసరం ఉందని.. అలా ఆదాయం పెరగాలంటే కంపెనీలు రావాలని, ఈ దిశగా ప్రభుత్వం తన ప్రయత్నాలు ముమ్మరం చేయాలని అంటున్నారు.

మరో మూడు నెలల్లో జగన్ పాలనకు ఏడాది పూర్తి కానున్న నేపథ్యంలో జగన్ ఇకనైనా భేషజాలకు పోకుండా రాష్ట్రాభివృద్ధికి పాటుపడాలని సూచనలు చేస్తున్నారు.