అభివృద్ధి వికేంద్రీకరణ అంటూనే విశాఖను హైదరాబాద్ లా మారుస్తారట…!!

అమరావతిలో రాజధాని ఉంటె భారీ ఖర్చు అవుతుంది. అమరావతి నిర్వహణ ప్రభుత్వానికి తలకు మించిన భారం. ఇప్పటికే ప్రభుత్వం దగ్గర డబ్బు లేదు. అప్పులు పెరిగిపోతున్నాయి. వడ్డీలు కట్టాల్సి వస్తుంది. ఈ పరిస్థితుల్లో రాజధాని అమరావతిలో ఉంచడం కంటే వేరే చోటికి మారిస్తే ఆ భారం తగ్గుతుంది అన్నది ప్రభుత్వం వాదన. ఇది పైకి చెప్తున్న విషయాలు. లోపల ఏం జరుగుతున్నది అనేది దాదాపుగా అందరికి తెలిసిన విషయమే.

తెలుగుదేశం పార్టీకి చెందిన వ్యక్తులకు అమరావతిలో భూములు ఉన్నాయి. రాజధానిని అక్కడే ఉంచితే వారంతా ఆర్ధికంగా బలపడతారు. వచ్చే ఎన్నికల నాటికి ఆర్ధికంగా పుంజుకుంటే, దాని ప్రభావం ఎన్నికల్లో పడుతుంది. ఎందుకైనా మంచిది అని చెప్పి వైకాపా రాజధానిని అమరావతి నుంచి విశాఖకు మారిస్తే అక్కడ ఉన్న భూములను వాడుకోవచ్చు. ఇప్పటికే అక్కడ చాలామంది వైకాపా నేతలు భూములు కొని పెట్టుకున్నారు. ఆ భూములకు వ్యాల్యూ పెరుగుతుంది. అందుకే మారుస్తామని అంటున్నారు.

రాష్ట్రంలో మూడు చోట్ల రాజధానులు ఉంచి మూడు ప్రాంతాలను అభివృద్ధి చేస్తామని చెప్పిన వైకాపా ఇప్పుడు విశాఖను రాబోయే ఐదు పదేళ్లలో దేశంలోని ప్రధాన నగరాలైన హైదరాబాద్, బెంగళూరు, ముంబై తరహాలో అభివృద్ధి చేస్తామని, దేశంలో ప్రధాన నగరాల్లో ఒకటిగా విశాఖను మారుస్తామని అంటున్నారు. ఇది ఎంతవరకు కరెక్ట్ అన్నది తెలియాలి.

విశాఖను అభివృద్ధి చేస్తే… వ్యవహారం మరలా మొదటికి వస్తుంది. మూడు ప్రాంతాల్లో తిరిగి ఉద్యమం మొదలౌతుంది. అమరావతిలో రాజధాని ఉంటె ఒప్పుకొని వైకాపా, ఇప్పుడు ఒక్క విశాఖనే ఎలా డెవలప్ చేస్తామని చెప్తున్నది. దీని వలన మిగతా ప్రాంతాల ప్రజలు ఏమైపోవాలి. ఇప్పటికే విశాఖ అభివృద్ధి చెందిన నగరాల్లో ఒకటిగా ఉన్నది. అక్కడ అన్ని ఉన్నాయి. 1956 హైదరాబాద్ నగరం కూడా అలా అభివృద్ధి చెందే ఉన్నది. ఆ తరువాత కూడా అక్కడే అభివృద్ధి చేశారు. అందుకే ప్రత్యేక ఉద్యమం జరిగింది. ఇప్పుడు విశాఖను అలానే మార్చాలని వైకాపా చూస్తున్నది. దీని వలన ప్రజలే కాదు ఆ పార్టీ కూడా ఇబ్బందులు పడాల్సి వస్తుంది.