హస్తినకు తెలుగు సీఎంలు.. కారణాలేంటో?

తెలుగు ముఖ్యమంత్రులు అకస్మాత్తుగా హస్తినబాట పడుతుండటం.. వేర్వేరుగా ప్రధాని మోదీతో సమావేశం కానుండటం సర్వత్రా చర్చనీయాంశమైంది. వాస్తవానికి ఏ ముఖ్యమంత్రైనా ప్రధానిని కలవడం, తమ రాష్ట్ర సమస్యలపై విన్నవించడం మామూలే. అయితే, తెలంగాణ సీఎం కేసీఆర్, ఏపీ సీఎం వైఎస్ జగన్ వరుసగా ఒకరి తర్వాత మరొకరు ప్రధాని మోదీతో సమావేశం కానుండటం మాత్రం ప్రాధాన్యత సంతరించుకుంది.

జగన్ ఇప్పటికే పలుమార్లు ప్రధానిని కలిసినా.. కేసీఆర్ మాత్రం కలవలేదు. ఆయన రెండోసారి సీఎంగా ప్రమాణ స్వీకారం చేసిన తర్వాత మర్యాదపూర్వకంగా మోదీని కలిశారు. అనంతరం జరిగిన రాజకీయ పరిణామాలతో కేంద్రంలోని బీజేపీ పెద్దలతో కేసీఆర్ కి దూరం పెరిగింది. మోదీ రెండోసారి అధికారంలోకి వచ్చిన తర్వాత ఆయన్ను కలిసేందుకు కేసీఆర్ పలుమార్లు ప్రయత్నాలు చేసినా ఫలితం దక్కలేదు. చివరకు కాళేశ్వరం ప్రాజెక్టు ప్రారంభోత్సవానికి కూడా ప్రధానిని ఆహ్వానించలేదు. అనంతరం కేంద్రంతో ఢీ అంటే ఢీ అనే రీతిలో టీఆర్ఎస్ వ్యవహరించింది.

ఈ నేపథ్యంలో దాదాపు 9 నెలల తర్వాత కేసీఆర్ కు శుక్రవారం ప్రధాని అపాయింట్ మెంట్ లభించడం ఆసక్తి కలిగిస్తోంది. అకస్మాత్తుగా కేసీఆర్ కి మోదీ అపాయింట్ మెంట్ ఇవ్వడానికి ఏదో బలమైన కారణం ఉందనే అభిప్రాయాలు వ్యక్తమవుతున్నాయి. గోదావరి, కృష్ణా నదీజలాలను అనుసంధాలించాలనే లక్ష్యంలో ఇరువురు సీఎంలు ముందుకెళుతున్న సంగతి తెలిసిందే. అయితే, ఈ విషయంలో కేంద్రం మదిలో మరో ఆలోచన ఉందని, ఈ నేపథ్యంలోనే ఇరువురు సీఎంలను పిలిచి మోదీ మాట్లాడాలని నిర్ణయించుకున్నట్టు సమాచారం.

అందువల్లే 9 నెలల విరామం తర్వాత కేసీఆర్ కు అపాయింట్ మెంట్ ఇచ్చారని ఢిల్లీ వర్గాలు చెబుతున్నాయి. కేసీఆర్ సైతం అందివచ్చిన ఈ అవకాశాన్ని వినియోగించుకుని తమ మధ్య పెరిగిన దూరాన్ని తగ్గించే ప్రయత్నం చేస్తారని అంటున్నారు. రాష్ట్ర సమస్యలు ప్రస్తావించడంతోపాటు ఆర్థికసాయం కోరనున్నారని తెలుస్తోంది. ఇక ఏపీ సీఎం జగన్ శనివారం ప్రధానితో భేటీ కానున్నారు. ఈ సందర్భంగా రైతుభరోసా పథకం ప్రారంభోత్సవానికి మోదీని ఆహ్వానించనున్నారు. అలాగే పలు అంశాలపై ప్రధానికి వినతులు ఇవ్వనున్నారు. రాజకీయాలపై చర్చించే అవకాశం ఉంది.