Intinta Ramayanam: ఈ మధ్యకాలంలో టాలీవుడ్ లో తెలంగాణ నేపథ్యంలో వస్తున్న సినిమాలు దూసుకుపోతున్నాయి. ఏడాది విడుదలైన ‘బలగం( Balagam)’, ‘దసరా( Dasara)’, ‘మేము ఫేమస్’ ఈ కోవలోకే వస్తాయి. ఇప్పుడు ‘ఇంటింటి రామాయణం( Intinti Ramayanam)’ సినిమా కూడా ఇదే దారిలో వెళ్తున్నట్లు తెలుస్తోంది. ఈ సినిమా ట్రైలర్ ని యువ హీరో సిద్దు జొన్నలగడ్డ( Siddhu Jonnalagadda) బుధవారం విడుదల చేశారు.
తెలంగాణలోని పల్లెటూర్ల సంప్రదాయాన్ని కళ్ళకు కట్టినట్లు ఈ ట్రైలర్ లో చూపించారు. పక్కా ఫ్యామిలీ, కామెడీ ఎంటర్టైనర్ గా ఈ చిత్రం రూపొందుతోంది. ‘ ఒక మనిషితో సఖ్యత గా ఉన్నప్పుడు లోపాలు బయటపడవు.. అదే మనిషితో సంబంధాలు తెగిపోయినప్పుడు అతని తప్పొప్పులు ఎలా బయటపడతాయనే’ అంశాన్ని ఆధారంగా తీసుకుని ఈ సినిమాను తెరకెక్కించినట్లు ట్రైలర్ ని చూస్తే తెలుస్తోంది. రాహుల్ రామకృష్ణ కామెడీ టైమింగ్, నవ్య స్వామి, సీనియర్ నటుడు నరేష్ నటన ఆద్యంతం ఆకట్టుకుంటోంది. గంగవ్వ మార్క్ డైలాగులు నవ్వు తెప్పిస్తున్నాయి.
సురేష్ నర్రెట్ల ఈ సినిమాకి దర్శకత్వం వహించారు. నాగ వంశీ సమర్పణలో వెంకట్ నిర్మిస్తున్నారు. కళ్యాణ్ మాలిక్ సంగీత దర్శకుడు. డైరెక్టర్ మారుతి టీం కూడా సినిమాలో భాగమైంది. ఈ సినిమా జూన్ 9న ప్రేక్షకుల ముందుకు రానుంది.