యశోదకు దిమ్మతిరిగే షాక్.. ఎలా వాడుతారంటూ మొట్టికాయలు!

టాలీవుడ్ స్టార్ బ్యూటీ సమంత నటించిన రీసెంట్ మూవీ ‘యశోద’ భారీ అంచనాల మధ్య ఇటీవల రిలీజ్ అయ్యింది. ఈ సినిమాను దర్శకద్వయం హరి-హరీశ్‌లు తెరకెక్కించగా, పూర్తి సస్పెన్స్ థ్రిల్లర్ అంశాలతో ఈ సినిమాను వారు తీర్చిదిద్దారు. ఇక ఈ సినిమా కథ సరోగసి నేపథ్యంలో సాగడంతో ప్రెజెంట్ ఆడియెన్స్‌కు ఈ సినిమా బాగానే కనెక్ట్ అయ్యింది. అయితే వసూళ్ల పరంగా కూడా యశోద బాక్సాఫీస్ వద్ద పర్వాలేదనిపించింది. కానీ, చిత్ర యూనిట్ ఆశించిన స్థాయిలో మాత్రం వసూళ్లు రాలేదని చెప్పాలి.

ఇక థియేట్రికల్ రన్ ముగించుకున్న యశోద సినిమాను ఓటీటీలో రిలీజ్ చేసేందుకు చిత్ర యూనిట్ సిద్ధమవుతోంది. ఈ చిత్ర డిజిటల్ రైట్స్‌ను ప్రముఖ ఓటీటీ ప్లాట్‌ఫాం అమెజాన్ ప్రైమ్ దక్కించుకోగా, ఈ చిత్రాన్ని డిసెంబర్ 19 నుంచి స్ట్రీమింగ్ చేయాలని వారు ప్లాన్ చేస్తున్నారు. కానీ, ఈ క్రమంలో యశోద చిత్ర యూనిట్‌కు ఓ గట్టి ఎదురుదెబ్బ తగిలింది. ఈ సినిమాలో ఎవా ఆసుపత్రి చుట్టూ కథ నడుస్తుండటం, ఆ ఆసుపత్రిలో సరోగసి ముసుగులో అన్యాయాలు జరుగుతున్నట్లుగా చిత్ర యూనిట్ సినిమాలో చూపించింది. అయితే ఇప్పుడు ఇదే వారికి తలనొప్పిని తెచ్చిపెట్టింది.

తమ ఆసుపత్రి పేరును సినిమాలో వాడటమే కాకుండా, తమ ఆసుపత్రిలో అన్యాయాలు జరుగుతున్నట్లుగా ప్రెజెంట్ చేయడం ఏమిటని ‘ఎవా ఐవిఎఫ్’ హాస్పిటల్ యాజమాన్యం కోర్టులో పిటీషన్ దాఖలు చేసింది. యశోద సినిమాలో ఎవా హాస్పిటల్స్ అనే పేరును వాడారని, అది తమ హాస్పిటల్ పేరు ప్రతిష్టలను దెబ్బతీస్తోందని సదరు ఆసుపత్రి యాజమాన్యం పేర్కొంది. దీంతో కోర్టు ఈ సినిమా ఓటీటీ ప్రదర్శన నిలిపివేయాలంటూ చిత్ర నిర్మాతలకు నోటీసులు జారీ చేసింది. ఈ సినిమాను ఓటీటీలో స్ట్రీమింగ్ చేయొద్దంటూ కోర్టు ఇంజెక్షన్ ఆర్డర్ ఇవ్వడంతో ఇప్పుడు యశోద చిత్ర యూనిట్ తలపట్టుకుంటుంది. మరి తదుపరి విచారణలో కోర్టు ఎలాంటి ఆదేశాన్ని జారీ చేస్తుందా అని అందరూ ఆసక్తిగా ఎదురుచూస్తున్నారు.