రోజా ఈజ్ బ్యాక్.! మంత్రి పదవి ఇందుకే ఇచ్చారేమో.!

సరిపోయింది సంబరం.! రాష్ట్రానికి రాజధాని ఏది.? అన్న ప్రశ్నకు సమాధానం లేదు. కేంద్రం మెడలు వంచి ప్రత్యేక హోదా తెస్తామన్నారుగా.? అన్న ప్రశ్నకీ జవాబు ఇవ్వరు. పోలవరం ప్రాజెక్టు ఎప్పుడు పూర్తవుతుందో తెలియదు.! కానీ, తిట్ల పంచాంగంలో మాత్రం వైసీపీ నేతలు, అందునా మంత్రులు మాస్టర్ డిగ్రీలు చేసేశారు.

అసలు రాష్ట్రంలో మంత్రులు ఎందుకున్నారు.? అంటే, ఇంకెందుకు.. రాజకీయ ప్రత్యర్థుల్ని బూతులు తిట్టడానికన్నట్టు తయారైంది వ్యవహారం. రోజూ మీడియాకెక్కి బూతులు తిడుతున్నారు కదా.? కనీసం అసెంబ్లీ సమావేశాల సమయంలో అయినా, కాస్త నోటికి సెన్సార్ వుండాలి కదా.? అంటే, ఛత్.. అసలు మంత్రి పదవి వచ్చిందే విచ్చలవిడిగా చెలరేగిపోవడానికన్నట్లు వ్యవహరిస్తుంటే.. ఇంకేం మాట్లాడగలం.?

మంత్రి రోజా తన శాఖకు సంబంధించి (పర్యాటకం) రాష్ట్రంలో చేపడుతున్న అభివృద్ధి కార్యక్రమాలపై ఏమన్నా మాట్లాడతారనుకుంటే, ఆ విషయాన్ని పక్కన పెట్టేసి, ‘మా నాయకుడు వైఎస్ జగన్ మోహన్ రెడ్డి మీద అవాకులు చెవాకులు పేలతావా.?’ అంటూ మాజీ మంత్రి, టీడీపీ నేత నారా లోకేష్ మీద తిట్ల దండకం అందుకున్నారు.

అంతేనా, ‘మా కొడాలి నాని అన్న గడ్డంలోని తెల్ల వెంట్రుకుని కూడా పీకలేరు..’ అంటూ సంచలన వ్యాఖ్యలు చేశారు రోజా. అయినా, ఆ వెంట్రుకలతో ఎవరికి పని.? ఆ మాత్రం ఇంగితం లేకుండా మంత్రి ఎలా మాట్లాడారు.? మాజీ మంత్రి నారా లోకేష్ మీద ‘వాడు.. వీడు..’ అంటూ విరుచుకుపడిపోయారు రోజా.

వావ్.! మంత్రి రోజా భాషా ప్రావీణ్యం అదిరిపోయింది కదూ.! ప్రత్యేక హోదా ఇవ్వాల్సిన కేంద్రాన్ని ప్రశ్నిస్తే మంత్రిగా రోజా ఇమేజ్ కాస్త పెరుగుతుందేమో.! పోలవరం ప్రాజెక్టు విషయంలో మాట్లాడితే, ఆమెకు విషయ పరిజ్ఞానం వుందని జనం నమ్మే అవకాశం వుంటుంది. కనీసం రైల్వే జోన్ గురించి ప్రస్తావించినా రోజాని రాజకీయ నాయకురాలిగా గుర్తించొచ్చు. అవి మానేసి ఏంటీ తిట్ల పంచాయితీ.? మహిళా లోకానికే మాయని మచ్చ.. అంటూ నెటిజనం తిట్టుకుంటున్నారు మంత్రి రోజాని.

అవసరమా ఇదంతా.? విలువైన ప్రజాధనాన్ని వెచ్చించి అసెంబ్లీ సమావేశాలు నిర్వహిస్తుంటారు. లక్షలు, కోట్లు ఖర్చవుతున్నాయి ఈ సమావేశాల నిర్వహణ కోసం. మంత్రులు తమ శాఖల మీద అవగాహన అవసరం లేదన్నట్టుగా వ్యవహరిస్తూ, తిట్ల పంచాంగం మీద అవగాహన పెంచుకోవడం శోచనీయం.