సీపీఎస్ పిల్లిమొగ్గలు.! మాట తప్పుడు, మడమ తిప్పుడు.!

‘మాట ఇచ్చామంటే, తప్పకూడదు. మాట తప్పే పరిస్థితి.. మడమ తిప్పే పరిస్థితి వస్తే.. పదవికి రాజీనామా చేసి వెళ్ళిపోవాలి.. అప్పుడే రాజకీయాలు బాగుపడతాయ్.. ప్రజలకు అలాంటప్పుడే రాజకీయ నాయకుల పట్ల విశ్వసనీయత పెరుగుతుంది..’ అంటూ వైఎస్సార్ కాంగ్రెస్ పార్టీ అధినేత వైఎస్ జగన్ మోహన్ రెడ్డి ఎంతో ‘విశ్వసనీయత’తో కూడిన వ్యాఖ్యలు చేశారు.

ప్రతిపక్ష నేతగా వుంటేనే ‘విశ్వసనీయత’ అవసరం.. అధికార పీఠమెక్కితే.. అంతకు ముందు ఇచ్చిన మాటలేవీ నిలబెట్టుకోవాల్సిన పనిలేదన్నట్లుగా వ్యవహరిస్తున్నారు వైఎస్ జగన్ మోహన్ రెడ్డి. ప్రతిపక్ష నేతగా వున్నప్పుడు ప్రత్యేక హోదాపై ఏం మాట్లాడారు.? కడప స్టీలు ప్లాంటు, విశాఖ రైల్వే జోన్, రాజధాని అమరావతి.. వంటి వాటి గురించి ఏమాట్లాడారు.? ఇప్పుడు ఏం చేస్తున్నారు.?

అవన్నీ ఓ యెత్తు.. సీపీఎస్ రద్దు వ్యవహారం ఇంకో యెత్తు. ‘అధికారంలోకి రాగానే, వారం రోజుల్లోనే సీపీఎస్ రద్దు చేసి తీరతాం..’ అంటూ వైసీపీ అధినేత ప్రతిపక్ష నేత హోగాలో వ్యాఖ్యానించారు. ఏదీ.? ఎక్కడ.! ‘మీరు మాట ఇచ్చారు కదా, మాట నిలబెట్టుకోండి..’ అని ఉద్యోగులు అడుగుతోంటే, ఉద్యోగులపై వైసీపీ సర్కారు ఉక్కుపాదం మోపుతోంది.

‘మాకు మీరిచ్చిన హామీని మీరు మర్చిపోయారేమో.. మేం మర్చిపోలేదు.. ఆ హామీని మీకు గుర్తు చేయడానికే ఛలో విజయవాడ అంటున్నాం..’ అని ఉద్యోగులు చెబుతున్నారు. ఉద్యోగుల్లో చీలిక తెచ్చేందుకోసం వైసీపీ సర్కారు.. నానా రకాల పిల్లిమొగ్గలూ వేస్తోంది. ఉపాధ్యాయులకు సంబంధించి ‘బంపర్ ఆఫర్’ కూడా ఇటీవలే వైసీపీ సర్కారు ప్రకటించింది. ‘ప్రమోషన్ల తాయిలాలూ’ ఇందులో భాగమే.

2019 ఎన్నికల్లో వైసీపీ అధికారంలోకి రావడానికి ఉద్యోగులు కీలక భూమిక పోషించారన్నది ఓపెన్ సీక్రెట్. అప్పట్లో చంద్రబాబు ప్రభుత్వంపై వున్న వ్యతిరేకత కంటే పది రెట్లు వ్యతిరేకత ఇప్పుడు ఉద్యోగుల్లో కనిపిస్తోంది. సమయం వచ్చినప్పుడు ఉద్యోగులు తాము చేయాలనుకున్నది చేస్తారన్న చర్చ రాజకీయ వర్గాల్లో జరుగుతోంది.