వైసీపీ కష్టం పగవాడిక్కూడా రాకూడదంతే.!

బీజేపీ, టీడీపీ కలవబోతున్నాయా.? జనసేన అధినేత పవన్ కళ్యాణ్ చేసిన ‘వైసీపీ వ్యతిరేక ఓటు చీలనివ్వను..’ అనే ప్రకటన వెనుక అంతరార్థం ఇదేనా.? జనసేన మాటల్ని బీజేపీ, టీడీపీ సీరియస్‌గా తీసుకున్నాయా.? ఔను, రాజకీయాల్లో ఏదైనా జరగొచ్చు. బీజేపీ – టీడీపీ మళ్ళీ కలవొచ్చు. బీజేపీ – టీడీపీ – జనసేన కలిసి పోటీ చేయొచ్చు.! ఖచ్చితంగా ఈ ఈక్వేషన్ 2024 ఎన్నికల్లో సాధ్యపడుతుందని చెప్పలేం.

టీడీపీతో కలవడం వల్ల లాభమా.? నష్టమా.? అన్నదానిపై బీజేపీ ఇంకా బేరీజు వేసుకోవాల్సి వుంది. మిత్ర పక్షం జనసేనతోనూ బీజేపీ చర్చించాల్సి వుంది. అదంతా జరగడానికి కొంత సమయం పడుతుంది. అయితే, ఢిల్లీ నుంచి అందుతున్న లీకుల ప్రకారం బీజేపీ – టీడీపీ మధ్య ఓ అవగాహన కుదిరినట్లే కనిపిస్తోంది.

అన్నటికీ మించి, గత కొద్ది రోజులుగా వైసీపీ అధినాయకత్వం దగ్గర్నుంచి, చోటా మోటా నాయకుల వరకూ జనసేన పార్టీ మీద విరుచుకు పడుతున్న వైనాన్ని చూస్తోంటే, జనసేన అంటే అంతలా ఆ పార్టీ భయపడుతోందన్న విషయం సుస్పష్టమవుతోంది బీజేపీ – టీడీపీని జనసేన కలుపుతోందా.? అన్నది వేరే చర్చ. కానీ, వైసీపీ భయం చూస్తోంటే, ‘మనం కలవాల్సిందే..’ అన్న భావన ఈ మూడు పార్టీల్లోనూ వ్యక్తమవడంలో వింతేముంది.?

చంద్రబాబుతో కలవొద్దంటూ బీజేపీ జాతీయ నాయకత్వానికి వైసీపీ ఢిల్లీ దూతలు గత కొంతకాలంగా మొరపెట్టకుంటూనే వున్నారు. ఈ మధ్య పదే పదే ఢిల్లీకి వెళుతున్న వైసీపీ అధినేత, ముఖ్యమంత్రి హోదాలో రాష్ట్రానికి కేంద్రం చేయాల్సిన సాయం గురించి మాట్లాడకుండా.. కేవలం రాజకీయ అంశాల గురించే మాట్లాడి వస్తున్నారన్న విమర్శలు లేకపోలేదు.

ఎంతలా వైసీపీ గింజుకుంటున్నా, బీజేపీ తన రాజకీయ వ్యూహాలకు అనుగుణంగానే ముందడుగు వేస్తుందన్నది నిర్వివాదాంశం. ఏమో, బీజేపీ లెక్కలు ఎలా వున్నాయో ప్రస్తుతానికైతే పూర్తి స్పష్టత లేదు. కానీ, ఈ ర్యాగింగ్ దెబ్బకి వైసీపీ గింజుకుంటోంది. వైసీపీ గింజుకుంటోంటే, ఆటోమేటిక్‌గా జనసేన పార్టీ మోములో ఖచ్చితంగా వెటకారపు నవ్వు కనిపిస్తుంటుంది. ప్చ్.. వైసీపీ కష్టం పగవాడిక్కూడా రాకూడదంతే.