విజయసాయిరెడ్డికి సీబీఐ మీద అంత నమ్మకమెలా వచ్చిందబ్బా.?

రాజ్యసభ సభ్యుడు, వైఎస్సార్ కాంగ్రెస్ పార్టీ జాతీయ ప్రధాన కార్యదర్శి (ప్రాంతీయ పార్టీకి జాతీయ ప్రధాన కార్యదర్శి ఏంటో..) విజయసాయిరెడ్డి, సోషల్ మీడియాలో బ్యాక్ టు బ్యాక్ రెండు ఇంట్రెస్టింగ్ ట్వీట్లు వేశారు. అదీ, టీడీపీ నేత దివంగత కోడెల శివప్రసాద్ గురించీ, టీడీపీ వ్యవస్థాపకుడు స్వర్గీయ నందమూరి తారకరామారావు చిన్న కుమార్తె ఉమామహేశ్వరి గురించీ.

‘ఉమామహేశ్వరి మరణంపై అనుమానాలున్నాయి. మా చంద్రన్న వేధించాడ? లేదా ఇంకెవరైనా చంపి ఉరివేశారా? ఎన్టీఆర్ కూతురు బేలగా ఆత్మహత్య చేసుకుందంటే ఎవరూ నమ్మడం లేదు. సీబీఐ దర్యాప్తు కోరి నిజం నిజం నిగ్గు తేల్చాలి బాబన్నా..’ అన్నది ఓ ట్వీటు.

ఇంకో ట్వీటులో ‘అప్పట్లో కోడెలది గుండెపోటు అన్నారు. తర్వాత ఉరి వేసుకున్నారని చెప్పారు. ఆయన మొబైల్ మాయం చేశారు. ఉమామహేశ్వరి గారిదీ సహజ మరణమని నమ్మించాలని చూశారు. చంద్రబాబుకి దగ్గరివాళ్ళే ఎందుకిలా అర్థాంతరంగా చనిపోతున్నారు.?’ అంటూ అనుమానం వ్యక్తం చేశారు విజయసాయిరెడ్డి.

నిజమే, ఇక్కడ విజయసాయిరెడ్డి వ్యక్తం చేసిన అనుమానాల్లో అర్థం వుంది. సీబీఐ విచారణ కూడా జరిగితే మంచిదే. కానీ, ఎప్పుడు.? సీబీఐ విచారణలో నిజాలు నిగ్గుతేలతాయనే నమ్మకాలున్నప్పుడు.

వైఎస్ జగన్ మోహన్ రెడ్డినీ, విజయసాయిరెడ్డినీ అక్రమాస్తుల కేసులో సీబీఐ అరెస్టు చేసినప్పుడు మాత్రం, సీబీఐ కుట్ర పూరితంగా వ్యవహరిస్తుంది.. అది పంజరంలో చిలక.! వైఎస్ వివేకానందరెడ్డి హత్య కేసులో సీబీఐ విచారణను స్వయంగా ఆయన కుమార్తె సునీతారెడ్డి కోరితే, ‘అవసరం లేదు..’ అని వైఎస్ జగన్ మోహన్ రెడ్డి కోర్టుకు విన్నవిస్తారు.

అత్యంత కిరాతకంగా వైఎస్ వివేకానందరెడ్డి హత్యకు గురైతే, దాన్ని గుండె పోటుగా చిత్రీకరించిన ఘనత వైసీపీదే కదా.! ఆ కేసులో వైసీపీ వద్దనుకున్నా సీబీఐ విచారణ జరుగుతోంది.. కానీ, విచారణ కొన‘సాగు’తోందంతే.! అలాంటి సీబీఐ, కోడెల విషయంలో అయినా, ఉమామహేశ్వరి విషయంలో అయినా నిజాలు నిగ్గు తేల్చుతుందని ఎలా అనుకోగలం.?

వైఎస్ రాజశేఖర్ రెడ్డి సంగతేంటి.? ఆయన హెలికాప్టర్ ప్రమాదంలో చనిపోతే, ఆ ఘటన వెనుక అనుమానాలున్నాయని తరచూ వైసీపీ ఆరోపిస్తుంటుంది. వైసీపీ చేతిలోనే ఇప్పుడు అధికారం వుంది. ఆనాటి ఆ కేసుని తిరగతోడి.. నిజాల్ని నిగ్గు తేల్చొచ్చు కదా.?