అంతులేని ప్రేమ.! టీడీపీతో వైసీపీ జత కట్టొచ్చుగా.?

తెలుగుదేశం పార్టీ మీద అంతు లేని ప్రేమ ప్రదర్శిస్తోంది అధికార వైసీపీ. వినడానికి చిత్రంగా వున్నా ఇది నిజం. తెలుగుదేశం పార్టీకి 2019 ఎన్నికల్లో 23 మంది ఎమ్మెల్యేలు మాత్రమే దక్కారు. ఆ తర్వాత ఆ పార్టీ నుంచి కొందరు ఎమ్మెల్యేలను నాటకీయంగా లాక్కుంది వైసీపీ.

నిజానికి, వైసీపీ తలచుకుంటే, టీడీపీలో చంద్రబాబు తప్ప ఇంకే ప్రజా ప్రతినిథీ మిగిలేవారు కాదు. కానీ, వైసీపీ అలా ఎందుకు చేయలేదు.? అంటే, టీడీపీ మీద ‘అంతు లేని ప్రేమ’ కారణంగానే. రాజకీయాల్లో అయితే టీడీపీ వుండాలి.. లేదంటే వైసీపీ వుండాలి.. ఆ రెండు పార్టీలు తప్ప, ఇంకో పార్టీ వుండకూడదన్నది ఇరు పార్టీల లక్ష్యం.

బీజేపీ – జనసేన ప్రస్తుతానికి రాజకీయంగా పొత్తులో వున్నాయి. ఆ పొత్తుని విచ్ఛిన్నం చేయాలంటే, టీడీపీకి జనసేనకు అక్రమ సంబంధం అంటగట్టాలి. తద్వారా టీడీపీకి లాభం చేకూర్చాలి.. ఇదీ వైసీపీ వ్యూహం. నిజానికి, టీడీపీ కథ 2019 ఎన్నికల్లోనే ముగిసింది. స్థానిక ఎన్నికల్లో ప్రధాన ప్రతిపక్షం కనీసపాటి ప్రభావం చూపలేదంటే, దానికి కారణమేంటి.? వైసీపీతో వున్న 60-40 అవగాహనే.

స్థానిక ఎన్నికల్లో అధికార వైసీపీతో గట్టిగా కొట్లాడింది జనసేన పార్టీనే. అందుకే, ఆ జనసేనను రాజకీయంగా చంపేయాలనే ప్రయత్నం చేస్తోంది వైసీపీ. ఈ క్రమంలో టీడీపీకి జాకీలేస్తోంది వైసీపీ. అసలంటూ టీడీపీ ప్రస్తావనే వైసీపీ తీసుకురాకపోతే, ఏపీ రాజకీయాల్లో టీడీపీ కథ ఎప్పుడో ముగిసిపోయేది.

జనసేన – టీడీపీ పొత్తు ద్వారా టీడీపీకి లాభం చేకూర్చాలని తహతహలాడుతున్న వైసీపీ, నేరుగా ఎందుకు టీడీపీతో జతకట్టకూడదు.? ఇదే ప్రశ్న వైసీపీ మద్దతుదారుల్లోనే జరుగుతోందిట. ‘ఒకప్పటి వైసీపీకి, ఇప్పటి వైసీపీకీ అస్సలు పొంతన లేదు. ఇప్పుడు వైసీపీలో జరుగుతున్నదంతా దివాళా కోరు రాజకీయం..’ అని వైసీపీ నేతలే ఆఫ్ ది రికార్డుగా చెప్పుకుంటున్నారు.

అచ్చం చంద్రబాబు డైరెక్షన్లోనే.. పబ్లిక్ మీటింగుల్లో ముఖ్యమంత్రి హోదాలో వైఎస్ జగన్ పెడుతున్న శాపనార్థాలు చూస్తోంటే, వైసీపీకి సమీప భవిష్యత్తులో చంద్రబాబే గౌరవాధ్యక్షుడిగా మారిపోయినా ఆశ్చర్యపోనక్కర్లేదన్న చర్చ రాజకీయ వర్గాల్లో జరుగుతోంది.