రఘురామకృష్ణరాజు రాజీనామాస్త్రం: వైఎస్సార్సీపీకి ‘తెగువ’ వుందా.?

తిరుపతి లోక్ సభ నియోజకవర్గానికి జరిగిన ఉప ఎన్నికలో గెలిచారు.. కడప జిల్లా బద్వేలు అసెంబ్లీ నియోజకవర్గానికి జరిగిన ఉప ఎన్నికలో గెలిచారు.. స్థానిక ఎన్నికల్లో దుమ్మురేపేశారు.. అసలు ఆంధ్రప్రదేశ్ రాష్ట్రంలో తమకు తిరుగే లేదని చెప్పుకుంటున్నారు.. అయినాగానీ, ఆంధ్రప్రదేశ్‌లో అధికార వైసీపీకి ఆ పార్టీ రెబల్ ఎంపీ రఘురామకృష్ణరాజు అంటే ఎందుకంత భయం.?

పొద్దున్న లేస్తే రఘురామ, అధికార వైసీపీ మీద దుమ్మెత్తి పోస్తూనే వుంటారు. ఈ గోల భరించలేక, ఆయన మీద అడ్డోగులగా కేసులు బనాయించి, లోపలేసి.. కుమ్మేశారు కూడా (అలాగని బాధితుడు రఘురామ ఆరోపిస్తున్నారు). అయినాగానీ, రఘురామ ‘పోటు’ నుంచి తప్పించుకోలేకపోతోంది అధికార వైసీపీ. ఈ నస ఎందుకు.? రఘురామ మీద అనర్హత వేటు వేయించెయ్యొచ్చు కదా.? అంటే, ప్రత్యేక విమానాలేసుకుని ఢిల్లీకి వెళ్ళి బొక్కబోర్లా పడ్డా, వైసీపీకి అది సాధ్యం కాలేదు.

ఎందుకీ తలనొప్పి, వైసీపీ నుంచి ఆయన్ని బహిష్కరించేయొచ్చు కదా.? అంటే, ఆ ధైర్యమూ వైసీపీ అధినాయకత్వానికి లేదాయె. ఇంతకీ, రఘురామకృష్ణరాజుకి ఇంత ధైర్యం ఎక్కడిది.? ఆయన మొండతనానికి అసలు కారణమేంటి.? ఇంత మొండిగా ఆయనెందుకు వైసీపీని ఢీకొడుతున్నారు.? వైసీపీలో వుంటే, ఆయనకు కొన్ని పనులు అవుతాయ్.. మరెందుకు వైసీపీతో పంచాయితీ పెట్టుకుంటున్నారు.?

కారణం ఏదైతేనేం.. రఘురామకృష్ణరాజు మాత్రం వైసీపీకి పక్కలో బల్లెంలా తయారయ్యారు.. అదే పద్ధతి కొనసాగిస్తున్నారు. ‘ఇక ఇలా కాదు, వారం రోజులు సమయం ఇస్తున్నా.. నా మీద అనర్హత వేటు వేయించండి.. అందుకు సిద్ధమా.? అలాగైతే, ఎనిమిదవ రోజున నేను రాజీనామా చేస్తాను.. వారం రోజుల సమయం సరిపోదా.? రెండు వారాలు తీసుకోండి.. పదిహేనో రోజున రాజీనామా చేస్తా..’ అంటూ రఘురామ తాజాగా సవాల్ విసిరారు.

ఎలాగూ రాజీనామా చేస్తానంటున్నారు గనుక, రాజీనామా చెసెయ్యక.. ఈ కండిషన్లు ఎందుకు పెడుతున్నట్టు.? వైసీపీ అసమర్థతను చాటేందుకోసమే సుమీ.! నిజానికి, వైసీపీకి ఇది బంపర్ ఆఫర్. రఘురామపై అనర్హత వేటు పడితే, ఉప ఎన్నిక వస్తుంది.. నర్సాపురంలో బంపర్ విక్టరీ కొట్టేందుకు వైసీపీకి అవకాశం దొరుకుతుంది. కానీ, రఘురామపై అనర్హత వేటు వేయించేంత సీన్ వైసీపీకి లేదాయె.

వైసీపీకి అంత సత్తా లేదని తెలిసే, రఘురామ.. కయ్యానికి కాలుదువ్వుతున్నారు.