రోడ్లకి గుంతలు: టీడీపీకి జాకీలేస్తున్న వైసీపీ.!

చంద్రబాబు ఐదేళ్ళ పాలనలో రోడ్ల మరమ్మత్తుల కోసం ఖర్చు చేసింది కేవలం 1,300 కోట్ల రూపాయలేనట. అదే, వైఎస్ జగన్ మోహన్ రెడ్డి పాలనలో మూడేళ్ళలోనే రోడ్ల మరమ్మత్తులకోసం ఏకంగా 2,400 కోట్లు ఖర్చు చేసేశారట. సో, ఎలా చూసినా వైఎస్ జగన్ పాలనే అద్భుతమన్నది ‘బులుగు బ్యాచ్’ వాదన.!

రోడ్ల మరమ్మత్తుల కోసం రెండు వేల నాలుగు వందల కోట్ల రూపాయల కేటాయింపు.. అనే మాట వైసీపీ అధికారంలోకి వచ్చినప్పటినుంచీ తరచూ వింటూనే వున్నాం. ‘ఏడవలేక మంగళవారం..’ అన్నాడట వెనకటికి ఒకడు. అలా తయారైంది పరిస్థితి.

‘వర్షాలొస్తున్నాయ్.. రోడ్ల మరమ్మత్తులు కుదరడంలేదు. మా ప్రభుత్వం వల్లనే వర్షాలు సమృద్ధిగా కురుస్తున్నాయ్.. ఆ కారణంగా రోడ్లు కొంతమేర దెబ్బ తినడం మామూలే..’ అంటూ వైసీపీ చెబుతూ వస్తోంది. దేశంలోనే కాదు, ప్రపంచంలో ఎక్కడా వర్షాలు కురవడంలేదు.. కాబట్టి, అక్కడెక్కడా రోడ్లు పాడవడంలేదు. కేవలం ఆంధ్రప్రదేశ్ రాష్ట్రంల, అదీ వైసీపీ పాలనలోనే వర్షాలు.. అందునా రోడ్లు పాడైపోవడం కోసమే కురుస్తున్నట్టుంది పరిస్థితి.

నవ్విపోదురుగాక మనకేటి సిగ్గు.? అన్న చందాన వైసీపీ కవరింగ్ చూస్తూనే వున్నాం. ఇంతకీ, 2400 కోట్ల రూపాయలు ఖర్చు చేసి, రాష్ట్రంలో రోడ్లకున్న గుంతల్ని పూడ్చేశారా.? లేదా.? కేటాయింపులు ఘనం, పనులేమో అయోమయం.. అన్నట్టు తయారైంది పరిస్థితి.

కొన్ని చోట్ల గుంతలు పూడ్చారు.. ఇంతలోనే వర్షాలు షురూ అయ్యాయి. పలు చోడ్లపై తారు, కంకర.. జస్ట్ ఉల్లిపొర తరహాలో వేసేసి, మమ అనిపించేశారన్న ఆరోపణలు వెల్లువెత్తుతున్న సంగతి తెలిసిందే. అంటే, 2400 కోట్ల రూపాయలూ బూడిదలో పోసిన పన్నీరేనన్నమాట.

ఇంతకీ, ఆ 2400 కోట్ల రూపాయలు ఎవరి జేబుల్లోకి వెళుతున్నాయి.? బులుగు కాంట్రాక్టర్ల జేబుల్లోకే కదా.? రోడ్లపై గుంతలు నాగరికతకు ఆనవాళ్ళు అట.. అలాగని ఓ బులుగు మేధావి సెలవిచ్చాడు. ఇదండీ పరిస్థితి.. ఆంధ్రప్రదేశ్ దుస్థితి.!