జస్ట్‌ ఆస్కింగ్‌: రాజకీయాల్లో ఓడితే ఇంట్లో కూర్చోవాల్సిందేనా.!

రాజకీయాల్లో గెలుపోటములు అత్యంత సహజం. అర శాతం ఓట్లతో అధికారం కోల్పోయిన పార్టీలుంటాయి. ‘మీకూ మాకు వచ్చిన ఓట్ల శాతంలో తేడా ఎంతో తెలుసా.? చాలా చాలా తక్కువ.! మీదేమీ గొప్ప విజయం కాదు..’ అని 2019 ఎన్నికలకు ముందు చాలాసార్లు చంద్రబాబుని ఎద్దేవా చేశారు అప్పటి ప్రతిపక్ష నేత వైఎస్‌ జగన్‌ మోహన్‌రెడ్డి. కానీ, ఇప్పుడు సీన్‌ మారింది. ‘రాష్ట్ర ప్రజలు మిమ్మల్ని తరిమికొట్టారు..’ అంటూ వైఎస్సార్‌ కాంగ్రెస్‌ పార్టీ, టీడీపీతో సహా విపక్షాల్ని ఉద్దేశించి ఎద్దేవా చేస్తున్నాయి. వైసీపీ చెబుతున్నదే నిజమైతే, 2014 ఎన్నికల్లో వైసీపీని కూడా జనం తరిమికొట్టినట్లే కదా.!

ఇక, తాజాగా రాష్ట్ర ప్రభుత్వం, న్యాయస్థానాల నుంచి ఎదుర్కొంటోన్న ‘మొట్టికాయల వ్యవహారంపై’ అధికార పార్టీ అనుకూల మీడియాలో రకరకాల కథనాలు వస్తున్నాయి. తాజాగా ఓ కేంద్ర మంత్రి చేసిన వ్యాఖ్యల్ని ‘కోట్‌’ చేస్తూ, ‘ఓడినవారు కోర్టుల ద్వారా ప్రభుత్వాన్ని నియంత్రించాలనుకోవడం సబబు కాదు’ అంటూ పెద్ద కథనాన్ని తెరపైకి తెచ్చింది. అంటే, ఓడిన రాజకీయ పార్టీలు ఇంట్లో కూర్చోవాలన్నమాట. 2014 నుంచి 2019 వరకూ వైఎస్సార్‌ కాంగ్రెస్‌ పార్టీ పలు విషయాల్లో న్యాయస్థానాల్ని ఆశ్రయించిన విషయం విదితమే. మరి, దాన్నేమంటారు.?

రాజకీయాల్లో ఇలాంటివన్నీ కామన్‌. దెబ్బ తగిలినోడు నీతులు చెబుతాడు.. దెబ్బ కొట్టినోడు విర్రవీగుతాడు. చిత్రమేంటంటే, గెలిచినా అధికార వైఎస్సార్సీపీ ఓటముల్ని చవిచూస్తోంది ఇటీవలి కాలంలో పలు విషయాల్లో. ‘మేం ప్రజా బలంతో అధికారంలోకి వచ్చాం..’ అంటూ వ్యవస్థల్ని ధిక్కరిస్తామంటే ఎలా.? ఎవరైనా ప్రజా బలంతోనే అధికారంలోకి వస్తారు. ఇంగ్లీషు మీడియం విషయంలో వైఎస్సార్సీపీ, ఆ పార్టీ అనుకూల మీడియా 2019కి ముందు ఏం చెప్పాయి.? ఇప్పుడు ఏం చెబుతున్నాయి.? అన్న విషయాల్ని పరిశీలిస్తేనే.. అసలు విషయం బోధపడుతుంది.

ఇదొక్కటే కాదు, చాలా విషయాల్లో ఇలాగే జరుగుతుంటుంది. ఆ పార్టీ ఈ పార్టీ అన్న తేడాల్లేవు.. ఏ పార్టీది అయినా ఒకటే తీరు. ప్రత్యేక హోదా విషయంలో గతంలో వైసీపీ ఏం చెప్పింది.? ఇప్పుడు ఏం చెబుతోంది.? టీడీపీ ఎన్నిసార్లు మాట మార్చింది.? ఇలాంటివన్నీ ప్రజలు పట్టించుకోరనుకుంటే ఎలా.? ప్రజాస్వామ్యంలో న్యాయ వ్యవస్థ కూడా అత్యంత కీలకమైనది. అలాంటి న్యాయవ్యవస్థను ఆశ్రయించడం ప్రాథమిక హక్కుగానే భావించాలి తప్ప, న్యాయస్థానాల ద్వారా ప్రభుత్వాల్ని నియంత్రించాలనుకోకూడదు.. అన్న మాట అధికార పక్షాల నుంచి వస్తే.. అది ఆయా పార్టీల అభద్రతా భావం మాత్రమే.