రాయలసీమలో కుంపటి రాజేస్తున్న వైసీపీ: నష్టమెవరికి.?

‘దగాపడ్డ రాయలసీమ..’ అంటూ వైసీపీ సీనియర్ నేత భూమన కరుణాకర్ రెడ్డి రాయలసీమ ఆత్మగౌరవ నినాదంతో తిరుపతిలో పెద్ద ‘షో’ చేస్తున్నారు. ఇందుకోసం రాయలసీమ జిల్లాల నుంచి పెద్దయెత్తున ప్రజానీకాన్ని తరలిస్తున్నారు. మొన్నామధ్యన విశాఖలో గర్జన నిర్వహించింది వైసీపీ.. అదీ నాన్ పొలిటికల్ జేఏసీ ముసుగులో. ఈసారి అలాంటి ముసుగులేం లేవు.. నేరుగా వైసీపీ ఎమ్మెల్యేనే హంగామా చేస్తున్నారు.

రాయలసీమ ఆత్మగౌరవం, దగాపడ్డ రాయలసీమ.. ఇలాంటి మాటలు చెప్పుకోవడానికి బాగానే వుంటాయి. ఎవరి చేతిలో రాయలసీమ దగా పడింది.? ఉమ్మడి ఆంధ్రప్రదేశ్ రాష్ట్రంలో కావొచ్చు, విభజిత ఆంధ్రప్రదేశ్‌లో కావొచ్చు.. ఎవరు.. ఏ ప్రాంతానికి చెందినవారు ఎక్కువ కాలం ముఖ్యమంత్రులుగా వున్నారు.? అన్న జనసేనాని పవన్ కళ్యాణ్ ప్రశ్నకు వైసీపీ ఎమ్మెల్యే భూమన కరుణాకర్ రెడ్డి సమాధానం చెప్పాల్సి వుంటుంది.

గతంలోలా ప్రజలు మోసపోయేందుకు ఇంకోసారి సిద్ధంగా వున్నారా.? ఏమో, అదైతే ఇప్పుడే చెప్పలేం. కానీ, ప్రజల్లో కొంతమేర చైతన్యం కనిపిస్తోంది. బలవంతంగా జనాన్ని తరలించడం తప్ప, సోకాల్డ్ రాజకీయ నాయకులు పిలుపునిస్తే స్వచ్ఛందంగా జనం ఆయా పెయిడ్ ఉద్యమాలకు వెళ్ళేలా కనిపించడంలేదు.

విశాఖ గర్జనలో నిరూపితమయ్యింది అదే. దాన్ని పెయిడ్ ఉద్యమంగా జనమే తేల్చేశారు. ఇప్పుడు తిరుపతిలో కూడా అదే జరగబోతోంది. తిరుపతిలో వైసీపీ నిర్వహిస్తున్న రాయలసీమ ఆత్మగౌరవం అనే కార్యక్రమానికి, అదే రాయలసీమకి చెందిన ముఖ్యమంత్రి వైఎస్ జగన్ మోహన్ రెడ్డి ఎందుకు హాజరు కావడంలేదు.?

అలాగే ఎగ్జిక్యూటివ్ క్యాపిటల్ తమ నినాదమని చెప్పుకుంటున్న వైసీపీ అధినేత వైఎస్ జగన్, విశాఖ గర్జనకు ఎందుకు హాజరు కాలేకపోయారు. ఇక్కడే అధికార పార్టీ డొల్లతనం బయటపడిపోయింది. వాస్తవానికి రాయలసీమ ఆత్మగౌరవ సభ కావొచ్చు.. ఇంకో పేరు ఏదైనా కావొచ్చు.. దాన్ని వైసీపీ జ్యుడీషియల్ క్యాపిటల్‌గా పేర్కొంటున్న కర్నూలులో కదా నిర్వహించాల్సింది.?

మూడున్నరేళ్ళవుతోంది రాష్ట్రానికి వున్న ఏకైక రాజధాని అమరావతిని అయోమయంలో పడేసి, దాన్ని స్మశానంగా అభివర్ణిస్తూనే.. దాన్ని మళ్ళీ శాసన రాజధాని అని పేర్కొనడంతోనే వైసీపీ చిత్తశుద్ధి ఏంటన్నది రాష్ట్రంలో అన్ని ప్రాంతాల ప్రజలకూ అర్థమయిపోతోంది. ఎలా చూసినా, ఈ బులుగు పెయిడ్ ఉద్యమాల వల్ల నష్టం వైసీపీకే తప్ప, వేరే పార్టీలకు ఎలాంటి నష్టం వుండబోదు.