విశాఖ మేయర్‌ పీఠం… వైకాపా నాయకుల ఆందోళన

గ్రేటర్‌ విశాఖ మున్సిపల్‌ కార్పోరేషన్‌‌ ఎన్నికల్లో వైకాపా ఘన విజయం సాధించింది. ఆ పార్టీ తరపున గొలగాని హరి వెంకటకుమారికి మేయర్ పీఠం ఇస్తూ నిర్ణయం తీసుకోవడం జరిగింది. ఈ నిర్ణయం పట్ల వైజాగ్ వైకాపా అధ్యక్షుడు సీహెచ్‌ వంశీ కృష్ణ శ్రీనివాస్ అభిమానులు అభ్యంతరం వ్యక్తం చేశారు. గతంలో వంశీ కృష్ణకు ఎమ్మెల్యే సీటు ఇస్తానని చెప్పి మోసం చేశారు. ఇప్పుడు మేయర్‌ చేస్తామని చెప్పి కార్పోరేటర్‌ గా పోటీ చేయించారు. ఇప్పుడు మేయర్ పదవి వేరే వారికి ఇచ్చి వంశీ కృష్ణకు అన్యాయం చేశారంటూ ఆరోపిస్తున్నారు.

ఈ విషయమై వంశీ కృష్ణ స్పందిస్తూ.. తనకు పదవి రాకుండా కొన్ని శక్తులు అడ్డుకున్నట్లుగా అనిపిస్తుంది. తన మీద విశాఖ వాసులు నమ్మకం ఉంచి ఓట్లు వేశారు. వారికి క్షమాపణలు చెబుతున్నాను. సీఎం జగన్ తో మాట్లాడి తాను కార్పోరేటర్‌ గా కొనసాగాలా లేదా అనే విషయమై నిర్ణయం తీసుకుంటాను అన్నాడు. మరో వైపు వంశీ కృష్ణ పార్టీ అధ్యక్ష పదవికి రాజీనామా చేసినట్లుగా వార్తలు వస్తున్నాయి. కాని ఇప్పటి వరకు ఆ విషయమై అధికారికంగా ఎలాంటి క్లారిటీ అయితే లేదు. మొత్తానికి విశాఖ వైకాపాలో పెద్ద కుదుపు అని మాత్రం ఈ పరిణామంను చెప్పుకుంటున్నారు.