జనసేనాని ఈక్వేషన్ క్లియర్.! వైసీపీకే టెన్షన్ టెన్షన్.!

వైసీపీ వ్యతిరేక ఓటు చీలనివ్వనని జనసేన అధినేత పవన్ కళ్యాణ్ చెప్పడమంటే, దానర్థం.. తెలుగుదేశం పార్టీతో కలిసి జనసేన పోటీ చేస్తున్నట్లేనని బులుగు పచ్చ విశ్లేషకులు తెగేసి చెబుతున్నారు. అయినా, ఇప్పటికిప్పుడు ఎన్నికలేమీ లేవు ఆంద్రప్రదేశ్ రాష్ట్రంలో. మిత్రపక్షం బీజేపీతో జనసేన ఏమైనా మరీ రాసుకు పూసుకు తిరుగుతోందా.?

ఎన్నికల సమయంలో పొత్తుల అంశం చర్చకు వస్తుంది. ఈలోగా వైసీపీ నేతలు తొందరపడి ‘ఓండ్రపెడుతుండడాన్ని’ జనసేన ఎంజాయ్ చేస్తోంది. అయితే, తెలుగు మీడియాలో మెజార్టీ మీడియా సంస్థలు టీడీపీకి అనుకూలమో.. లేదంటే వైసీపీకి అనుకూలమో అన్నట్లు వ్యవహరిస్తున్నాయి.

ఇది చాలక, ప్రభుత్వ ప్రకటనల పేరుతో వెబ్ మీడియాని కూడా వైసీపీ తన అదుపులోకి తెచ్చుకుంటోంది. ప్రభుత్వ ప్రకటనలు రావాలంటే, అధికార పార్టీ అనుకూల కథనాలు తప్పనిసరి. నిజానికి.. ప్రభుత్వం వేరు.. పార్టీ వేరు.! కానీ, జరుగుతున్నది అది కాదు.

ప్రజా ధనం వెచ్చించి ఇచ్చే ప్రభుత్వ ప్రకటనలతో, అధికార పార్టీకి అనుకూలంగా వార్తలు రాయించుకుంటున్నారు. ఇంత చేస్తూ కూడా జనసేన అంటే వైసీపీ ఎందుకు భయపడుతోంది.? అన్నది రాజకీయ విశ్లేషకుల్ని సైతం ఆశ్చర్యపరుస్తోంది.

‘వైనాట్ 175’ అనే ధీమా వైపీపీలో వున్నప్పుడు, జనసేన గురించి ఆలోచించాల్సిన పనిలేదు. కానీ, ‘నేను అధికారంలోకి రావడం, రాకపోవడం అనేది వేరే విషయం. ముందైతే మీ భవిష్యత్తు గురించి మీరు ఆలోచించండి.. జనసేన అధికారంలోకి వస్తే, మీకు మంచి పాలన అందిస్తానని మాత్రం నేను చెప్పగలను..’ అని జనసేన అధినేత స్పష్టం చేస్తున్నారు.

వైసీపీ వ్యతిరేక ఓటు చీలనివ్వను.. అంటే, ఆ వైసీపీ వ్యతిరేక ఓటు మొత్తం జనసేన వైపు తిరిగేలా చేస్తానన్నది జనసేనాని చెబుతున్నమాట. ఈ క్రమంలో టీడీపీ కూడా తమతో కలిసి వస్తుందని జనసేనాని భావిస్తే అందులో తప్పేముంది.? ఈ విషయం వైసీపీకి స్పష్టంగానే అర్థమవుతోంది. కానీ, అర్థం కానట్లు వ్యవహరిస్తోంది.. పెడార్ధాలు తీస్తోంది.

ఓ పాతిక సీట్లు జనసేకు వచ్చినా, జనసేనకు అది చాలా అడ్వాంటేజ్. 2019 ఎన్నికల్లో వచ్చింది ఒక్కటే సీటు. ఆ లెక్కన.. ఇంకోటి గెలిచినా. అది జనసేన బలం పుంజుకున్నట్లే అవుతుంది. అలాంటిది, 100కి పైగా సీట్లలో జనసేన సత్తా చాటే అవకాశం వుందంటూ పలు నివేదికలు చెబుతున్న దరిమిలా వైసీపీ కంగారుపడకుండా ఎలా వుంటుంది.?