పొలిటికల్ మైనింగ్: ఎవరు అధికారంలో వున్నా దోపిడీనే.!

‘మేం అధికారంలోకి వస్తే మైనింగ్ మాఫియా గుట్టు రట్టు చేస్తాం.. మైనింగ్ కింగ్స్ అంతు చూస్తాం..’ అని ప్రధాన రాజకీయ పార్టీలు చెప్పడం, అధికారంలోకి వచ్చాక, నిస్సిగ్గుగా మైనింగ్ మాఫియాని తమ కనుసన్నల్లో నడిపించడం మామూలే. వైఎస్ రాజశేఖర్ రెడ్డి హయాంలోనే మైనింగ్ మాఫియా మొదలైందని టీడీపీ నేత పట్టాభి తాజాగా సెలవిచ్చారు. ఔనా.? అదే నిజమైతే, ఐదేళ్ళ కాలంలో మైనింగ్ మాఫియాని ఏం చేశారు.?

మైనింగ్ మాఫియా పేరు చెప్పి, చంద్రబాబు హయాంలో ఎంతమంది రాజకీయ నాయకుల్ని అరెస్టు చేసి జైళ్ళకు పంపించారు.? ప్చ్.. సమాధానం దొరకదు. పైగా, చంద్రబాబు హయాంలో చాలామంది టీడీపీ నేతలు మైనింగ్ మాఫియా డాన్స్.. అన్నట్టుగా అవతారమెత్తారు. అప్పట్లో వైసీసీ, టీడీపీ మైనింగ్ మాఫియాపై విరుచుకుపడింది. మరిప్పుడు, వైసీపీ ఏం చేస్తోంది.? తమ మాట వింటే సరే సరి.. లేదంటే, బెదిరింపులకు దిగుతోంది. మైనింగ్ రంగు మారుతోందేమోగానీ.. మైనింగ్ మాత్రం ఆగడంలేదు. కొన్నాళ్ళ క్రితం యెల్లో మాఫియా, ఇప్పుడు బ్లూ మాఫియా.. అంతే తేడా. అంతిమంగా జరిగేది మాత్రం మైనింగ్ మాఫియానే. దోపిడీ కొత్త పుంతలు తొక్కుతోంది. రోడ్లను తవ్వేసిపోతున్నారిప్పుడు.. అదీ రాజధాని అమరావతిలో.

మైనింగ్ మాఫియా అనండి.. పొలిటికల్ మైనింగ్ మాఫియా అనండి.. పేరేదైతేనేం.. మట్టి, ఇసుక, కంకర, విలువైన ఖనిజాలు.. దేన్నీ వదలడంలేదు ఈ పొలిటికల్ మాఫియా. టీడీపీ నేతృత్వంలో నిజ నిర్ధారణ కమిటీ.. అంటూ కొండపల్లి ప్రాంతంలో రచ్చ చేయడంతో, దానికి దళిత రంగు పులిమిన అధికార పార్టీ, ప్రజల దృష్టిని తెలివిగా డైవర్ట్ చేయగలిగింది. తూర్పుగోదావరి జిల్లా, విశాఖ జిల్లా.. ఆ మాటకొస్తే, మొత్తంగా 13 జిల్లాల్లోనూ మైనింగ్ మాఫియా రాజ్యమేలుతూనే వుంది. ఆయా జిల్లాల్లోని ఆయా ప్రాంతాల్లో ఫలానా మైనింగ్ మాఫియా వెనుక ఎవరున్నారో అందరికీ తెలుసు.

పైకి పొలిటికల్ కుస్తీ, తెరవెనుకాల మైనింగ్ మాఫియా దోస్తీ.. ఇదీ నేటి రాజకీయం. టీడీపీకి చెందిన ఓ మాజీ మంత్రి, ఈ మైనింగ్ వివాదాల తలనొప్పి భరించలేక, వైసీపీలో చేరిపోయిన విషయం విదితమే. ఒకాయన లొంగని కారణంగా కేసులు ఎదుర్కొన్నారు, ఎదుర్కొంటూనే వున్నారు. చంద్రబాబు హయాంలో, ప్రకాశం జిల్లాకి చెందిన ఓ మైనింగ్ మాఫియా కింగ్.. టీడీపీ ఒత్తిళ్ళకు భయపడి, వైసీపీ నుంచి టీడీలోకి దూకేసిన విషయం ఎలా మర్చిపోగలం.? అంతిమంగా అందరూ ఒకటే.. దోచేసేది.. విలువైన ఖనిజాన్ని. తోడు దొంగల దోపిడీకి రాష్ట్రం గుల్ల అయిపోతోందంతే.