YS Vivevakanda Reddy: నాలుగేళ్ళ క్రితం దారుణ హత్యకు గురైన మాజీ ఎంపీ వైఎస్ వివేకానంద రెడ్డికి అసలు ఆస్తులెన్ని వుండేవి.? అవి ఎవరి పేరు మీద వుండేవి.? ఎన్నికల అఫిడవిట్‌లో చూపించిన దాదాపు నలభై కోట్ల రూపాయల విలువైన ఆస్తుల సంగతేంటి.?
వైఎస్సార్ తెలంగాణ పార్టీ అధినేత్రి వైఎస్ షర్మిల, తన బాబాయ్ వైఎస్ వివేకానంద రెడ్డి పేరు మీద పెద్దగా ఆస్తులేమీ లేవనీ, వున్న ఆస్తులన్నీ ఏనాడో సునీతా రెడ్డి పేరు మీద బదలాయించేశారనీ, నిజానికి ఆస్తులు కొన్నదే సునీతా రెడ్డి పేరు మీద అని షర్మిల చెప్పుకొచ్చారు.
సరే, షర్మిల చెప్పిన మాటల్లో నిజమెంత.? అన్నది వేరే చర్చ. ఎన్నికల అఫిడవిట్‌లో అయితే 40 కోట్ల రూపాయల మేర ఆస్తులకు సంబంధించి లెక్క చూపించారు గతంలో వైఎస్ వివేకానంద రెడ్డి.
వాటి డాక్యుమెంట్లను వైసీపీ తెరపైకి తెచ్చింది. వైసీపీ సానుభూతిపరులైన నెటిజన్లు ఆయా ఆస్తుల వివరాల్ని సోషల్ మీడియాలో పెట్టేస్తున్నారు.. డాక్యుమెంట్లతో సహా.! ఇదెక్కడి పంచాయితీ.?
వైసీపీనే కొన్నాళ్ళ క్రితం చెప్పుకొచ్చింది.. వైఎస్ వివేకానంద రెడ్డి అత్యంత సౌమ్యుడనీ, వ్యక్తిగతంగా ఆస్తులేమీ సమకూర్చుకోలేదనీ. అంతలోనే, ఆర్థిక ఇబ్బందుల నేపథ్యంలో సెటిల్మెంట్లకు పాల్పడ్డానీ, మహిళలపై మోజు ప్రదర్శించేవాడనీ, అలా ఓ ముస్లిం మహిళతో వివాహేతర సంబంధం పెట్టుకుని, ఆ తర్వాత ఆమెను రెండో వివాహం చేసుకున్నాడనీ వైసీపీనే చెబుతోంది.
ఏది నిజం.? అసలు వివేకా ఆస్తుల లెక్క ఎంత.? షర్మిల వ్యాఖ్యలు, వైసీపీ ఆరోపణల నేపథ్యంలో వైఎస్ వివేకా కుమార్తె సునీతా రెడ్డి స్పందిస్తారా.? వేచి చూడాలిక.