స్క్రిప్టు లేకుండా విమర్శలైనా చేయలేకపోతున్న సీఎం జగన్.! ఎందుకిలా.?

ఎలాంటి జగన్ ఎలా అయిపోయాడు.? ఈ చర్చ ఇప్పుడు సోషల్ మీడియాలో జరుగుతోంది. యువజన శ్రామిక రైతు కాంగ్రెస్ పార్టీ అధినేత వైఎస్ జగన్ మోహన్ రెడ్డి, ఇప్పుడు ఆంధ్రప్రదేశ్ రాష్ట్రానికి ముఖ్యమంత్రి కూడా.

ప్రజా సంకల్ప యాత్రలో, అంతకు ముందూ.. వైఎస్ జగన్ మోహన్ రెడ్డి సుదీర్ఘ ప్రసంగాలు చేసేవారు. అసెంబ్లీలోనూ గలగలా మాట్లాడగలిగేవారు ప్రతిపక్ష నేత హోదాలో. కానీ, ఇప్పుడేమయ్యింది.? రాసిచ్చిన స్క్రిప్టు చదవడం తప్ప, తనంతట తానుగా మాట్లాడలేకపోతున్న దయనీయ స్థితి ఎందుకొచ్చింది.

నర్సాపురంలో ముఖ్యమంత్రి వైఎస్ జగన్, ఓ అధికారిక కార్యక్రమంలో పాల్గొన్నారు. ఈ సందర్భంగా ఏర్పాటు చేసిన బహిరంగ సభలో ప్రసంగించారు. షరామామూలుగానే, ఆయన ప్రసంగించలేదు.. స్క్రిప్టు చదివేశారంతే. విపక్షాలపై విమర్శలు చేసే క్రమంలో కూడా ముఖ్యమంత్రి జగన్ స్క్రిప్టుని పదే పదే చూసుకోవాల్సి వచ్చింది.

కొన్ని కఠిన పదాలు స్క్రిప్టులో వున్నాయేమోగానీ, ‘సాంద్రత’ వంటి పదాలు వచ్చినప్పుడు, వాటిని పలికేందుకు వైఎస్ జగన్ నానా తంటాలూ పడ్డారు. ఇది ఇంటర్నెట్ యుగం. చిన్న తప్పు కూడా, పెద్దగా ప్రొజెక్ట్ అవుతున్న రోజులు. అందునా, ఇలాంటి వాటి విషయంలో ‘సోషల్ వేధింపులు’ మొదలెట్టిందే వైఎస్సార్ కాంగ్రెస్ పార్టీ. అందుకే, ఆ పార్టీకే ఇప్పుడు షాక్‌లు తగులుతున్నాయి.

టీడీపీని తెలుగు బూతుల పార్టీగానూ, జనసేన పార్టీని రౌడీ సేనగానూ అభివర్ణించే క్రమంలోనూ ముఖ్యమంత్రి వైఎస్ జగన్ పదే పదే ‘స్క్రిప్టు’ చూసుకోవాల్సి వచ్చింది. ‘ముందైతే, స్క్రిప్టుతో పనిలేకుండా మాట్లాడితే.. ఆ తర్వా విమర్శలు చేసే నైతిక హక్కు మీకుంటుంది ముఖ్యమంత్రిగారూ..’ అంటూ నెటిజన్లు ఓ ఆట ఆడేసుకుంటున్నారు.

ఇదిలా వుంటే, కొందరు మహిళలు సీఎం సభ వద్ద అవమానాల్ని ఎదుర్కొన్నారు. నల్ల చున్నీల్ని తొలగించాల్సిందిగా పోలీసులు ఆదేశించారు. బహుశా నిరసన కోసం వాటిని వినియోగిస్తారని భయపడినట్టున్నారు. ఇంకోపక్క, బోల్డంత ఖర్చు చేసి జనాన్ని రప్పిస్తే.. ముఖ్యమంత్రి ప్రసంగం ప్రారంభమవుతూనే.. గేట్లు దూకేసి జనం బయటకు పారిపోతున్న పరిస్థితి కనిపించింది.