సీఏఏకి వ్యతిరేక తీర్మానం: కేసీఆర్‌ ఏం సాధించినట్లు.?

పౌరసత్వ సవరణ చట్టం (సిఎఎ)కి వ్యతిరేకంగా తెలంగాణ అసెంబ్లీ తీర్మానం చేసింది. తనకు సైతం జనన ధృవీకరణ పత్రం లేదనీ, తనలాంటి వారు లక్షలాది మంది వుంటారనీ ఈ తీర్మానంపై చర్చ సందర్భంగా తెలంగాణ ముఖ్యమంత్రి కేసీఆర్‌ సుదీర్ఘంగా ప్రసంగించారు. కేసీఆర్‌ ప్రసంగం పట్ల మిత్రపక్షం మజ్లిస్‌ హర్షం వ్యక్తం చేసింది. కాంగ్రెస్‌ పార్టీ కూడా ఈ విషయంలో తెలంగాణలోని అధికార పార్టీకి మద్దతు పలకడం గమనార్హం.

కాగా, బీజేపీ ఎమ్మెల్యే రాజాసింగ్‌ మాత్రం తీర్మానం తాలూకు ప్రతుల్ని చింపి పారేసి, తన నిరసనను వ్యక్తం చేశారు. పౌరసత్వ సవరణ చట్టానికి సంబంధించి దేశవ్యాప్తంగా కొంత గందరగోళం నెలకొన్న మాట వాస్తవం. అయితే, ఈ వ్యవహారంపై ఇప్పటికే కేంద్రం ఒకటికి పదిసార్లు వివరణ ఇచ్చింది. సీఏఏ కావొచ్చు, ఎన్‌పిఆర్‌ కావొచ్చు, ఎన్‌ఆర్‌సి కావొచ్చు.. ఇవేవీ భారతదేశంలో నివసిస్తోన్న భారతీయులెవరికీ సమస్యలు సృష్టించేవి కావని అంటోంది కేంద్రం.

కానీ, ప్రజల్లో.. మరీ ముఖ్యంగా మైనార్టీల్లో కొంత అభద్రతాభావం నెలకొంది. అది కూడా, రాజకీయ నాయకులు ప్రేరేపించిన అభద్రతా భావమేనన్నది ఇంకో వాదన. ఆ సంగతి పక్కన పెడితే, ఓ రాష్ట్ర అసెంబ్లీ సీఏఏకి వ్యతిరేకంగా తీర్మానం చేస్తే ఏమవుతుంది.? తక్షణం కేంద్రం, ఈ వ్యవహారం నుంచి వెనక్కి తగ్గే అవకాశం వుండదుగాక వుండదు. ఒక్క రాష్ట్రమే కాదు, మరికొన్ని రాష్ట్రాలూ వ్యతిరేకించినా.. కేంద్రం వెనకడుగు వేయకపోవచ్చు.

ఎందుకంటే, సీఏఏని అత్యంత ప్రతిష్టాత్మకంగా తీసుకుంది బీజేపీ నేతృత్వంలోని ఎన్డీయే సర్కార్‌. ఈ సీఏఏ సెగల నేపథ్యంలోనే ఢిల్లీ అట్టుడికినా కేంద్రం కాస్త కూడా బెదరలేదంటేనే.. కేంద్రం, సీఏఏ విషయంలో ఎంత ఖచ్చితత్వంతో వుందో అర్థం చేసుకోవచ్చు. అన్నట్టు, ఉమ్మడి ఆంధ్రప్రదేశ్‌ విభజనకు సంబంధించిన బిల్లుని, అప్పటి ఉమ్మడి రాష్ట్ర అసెంబ్లీ తిరస్కరిస్తూ తీర్మానం చేసిన విషయం విదితమే.

అయినా, పార్లమెంటులో బిల్లు పాస్‌ అయ్యింది. దాన్ని ఇప్పుడు కొందరు ప్రస్తావిస్తూ, రాష్ట్రాల అసెంబ్లీలు చేసే తీర్మానాలకు విలువెంత.? అన్న చర్చను తెరపైకి తెస్తున్నారు. ఇదిలా వుంటే, త్వరలో ఆంధ్రప్రదేశ్‌ అసెంబ్లీలో కూడా సీఏఏకి వ్యతిరేకంగా తీర్మానం చేయాలన్న ఆలోచనతో అక్కడి అధికార వైఎస్సార్సీపీ వున్న విషయం విదితమే. అయితే, ఆ వైసీపీనే, సీఏఏకి పార్లమెంటు సాక్షిగా మద్దతు తెలపడం గమనార్హం.