విజయ్‌, అజిత్‌.. ఎవరి కాళ్ళ కింద ఎవరు.?

తమిళంలో ఇద్దరు పెద్ద హీరోల అభిమానుల మధ్య సోషల్‌ మీడియా వేదికగా ‘రచ్చ’ గత కొన్నాళ్లుగా చాలా తీవ్రస్థాయిలో జరుగుతోంది. రోజురోజుకీ ఈ రచ్చ కొత్త పుంతలు తొక్కుతోంది. ‘అతి’ అభిమానానికి పరాకాష్టగా తమిళ సినీ అభిమానుల గురించి చెప్పుకుంటుంటాం. అది నిజమేనని ఇటు విజయ్‌ అభిమానులు, అటు అజిత్‌ అభిమానులూ ప్రూవ్‌ చేసుకుంటున్నారు.

మొన్నీమధ్యనే విజయ్‌ని సోషల్‌ మీడియా వేదికగా చంపేశారు అజిత్‌ అభిమానులు. ‘రిప్‌ విజయ్‌’ అనే హ్యాష్‌ ట్యాగ్‌ని అజిత్‌ అభిమానులు ట్రెండింగ్‌లోకి తీసుకొచ్చిన విషయం విదితమే. దానికి కౌంటర్‌ ఇస్తూ, విజయ్‌ అభిమానులూ, అజిత్‌ని ట్రోల్‌ చేశారు. తాజాగా ‘ఆల్‌ ఎంపరర్స్‌ అండర్‌ అజిత్‌ ఫుట్‌’ అనే హ్యాష్‌ ట్యాగ్‌ని ట్రెండింగ్‌లోకి తీసుకొచ్చారు అజిత్‌ అభిమానులు. ‘అజిత్‌ కాళ్ళ కింద ఎవరైనా వుండాల్సిందే..’ అన్నది ఆ హ్యాష్‌ ట్యాగ్‌ సారాంశం.

లక్షల సంఖ్యలో ట్వీట్లు పోటెత్తాయ్‌ ఈ హ్యాష్‌ ట్యాగ్‌తో. ఆ వెంటనే, విజయ్‌ అభిమానులు అలర్ట్‌ అయ్యారు, అజిత్‌ని ఓ ఆట ఆడేసుకున్నారు. విజయ్‌ కాళ్ళ కిందనే అజిత్‌.. అంటూ కొత్త హ్యాష్‌ ట్యాగ్‌ సృష్టించి ట్రెండింగ్‌లోకి తీసుకొచ్చారు. అటు అజిత్‌గానీ, ఇటు విజయ్‌గానీ తమ అభిమానులు శాంతంగా వుండాలనే కోరుకుంటున్నారు. దురదృష్టవశాత్తూ అభిమానుల్లోనే ఆ సంయమనం కొరవడుతోంది.

అజిత్‌, విజయ్‌ వ్యవహారం పక్కన పెడితే, తెలుగులోనూ అప్పుడప్పుడూ ఈ తరహా రచ్చని చూస్తుంటాం. మరీ ముఖ్యంగా విజయ్‌ దేవరకొండ అభిమానులైన ‘రౌడీస్‌’ ఇలాంటి చెత్త హ్యాష్‌ట్యాగ్స్‌ని ప్రచారంలోకి తెస్తుంటారు. మహేష్‌, ప్రభాస్‌, రామ్‌చరణ్‌, అల్లు అర్జున్‌, పవన్‌కళ్యాణ్‌ అభిమానుల పేరుతోనూ కొన్ని గ్యాంగులు ఈ తరహా నెగెటివ్‌ వైబ్స్‌తో ఊగిపోతుంటారు.

హీరోల మధ్య ఆరోగ్యకరమైన పోటీ వుండాలి.. ఆ పోటీ అభిమానుల్ని ఉత్సాహపరచాలి. అంతే తప్ప, అభిమానులు హద్దులు మీరుతున్నా, హీరోలు లైట్‌ తీసుకుంటే, అది ప్రమాదకర పరిస్థితులకు దారి తీస్తుంది. తమిళ హీరోలు విజయ్‌, అజిత్‌.. తమ అభిమానుల విషయంలో ఒకింత సీరియస్‌గా వ్యవహరించాల్సిన సమయం ఆసన్నమైంది.