తిరుపతి బై పోల్: అధికార వైసీపీ గెలుపు అంత వీజీ కాదా.?

పంచాయితీ ఎన్నికల్లో ప్రత్యర్థులకు అవకాశమే లేకుండా చేసేసింది వైసీపీ. మునిసిపల్, కార్పొరేషన్ ఎన్నికల సంగతి సరే సరి. అసలంటూ నామినేషన్లు వేయడానికే విపక్షాలు నానా తంటాలు పడాల్సి వచ్చింది. ఎలాగోలా నామినేషన్లు వేస్తే, వారినీ బెదిరించి చాలావరకు ‘ఉపసంహరించుకునేలా’ చేసింది అధికార వైఎస్సార్ కాంగ్రెస్ పార్టీ. మరి, తిరుపతి లోక్‌సభ ఉప ఎన్నిక పరిస్థితేంటి.? ఇక్కడ ఏకగ్రీవానికి అవకాశం లేదుగానీ.. ఏ చిన్న అవకాశం వున్నా, అధికార వైసీపీ అస్సలు ఊరుకునేదే కాదు.

అంతా బాగానే వుందిగానీ, తిరుపతి ఉప ఎన్నికలో వైసీపీ పరిస్థితేంటి.? పంచాయితీ, మునిసిపల్ కార్పొరేషన్ ఎన్నికల తరహాలోనే పోటీ, ఫలితం ఏకపక్షమవుతుందని వైసీపీ నమ్ముతోందా.? అంటే, ఛాన్సే లేదన్న చర్చ రాజకీయ వర్గాల్లో జరుగుతోంది. నిజానికి తిరుపతి ఉప ఎన్నిక విషయమై వైసీపీలోనూ ‘ఆందోళన’ తారాస్థాయికి చేరుతోంది. పార్టీ ముఖ్య నేతలు, మంత్రులు.. మొత్తంగా తిరుపతిలో మోహరించాల్సిన పరిస్థితి వచ్చింది.

అటువైపు ప్రత్యర్థులు బలంగా లేకపోయినాసరే, బంపర్ మెజార్టీ లక్షంగా ముఖ్యమంత్రి వైఎస్ జగన్, పార్టీ శ్రేణులకు ఖచ్చితమైన లక్ష్యాల్ని నిర్దేశిస్తున్నారట. తప్పదు మరి. విపక్షాలు గెలిచే అవకాశం వుందా.? లేదా.? అన్న విషయాన్ని పక్కన పెడితే, గట్టి పోటీ ఇచ్చినాసరే.. అది వైసీపీకి నైతిక ఓటమిగా మారుతుందన్నది వైసీపీ వర్గాల ఆందోళన.

మరోపక్క, లోక్‌సభ సీటు కావడంతో, బీజేపీ సర్వశక్తులూ ఒడ్డనుంది. ఈ మేరకు బీజేపీ బృందాలు ఇప్పటికే తిరుపతి లోక్‌సభ నియోజకవర్గ పరిధిలో వ్యవహారాలు చక్కబెట్టేస్తున్నాయి. వివిధ రాష్ట్రాల్లో జరుగుతున్న అసెంబ్లీ ఎన్నికల ప్రచారంలో బిజీగా వున్న బీజేపీ అగ్రనాయకత్వం, ఏపీలో ఏం చేయాలన్నదానిపై ఇప్పటికే ఓ రూట్ మ్యాప్ సిద్ధం చేసుకుని, ఆ దిశగా పార్టీ శ్రేణుల్ని సమాయత్తం చేసుకున్నట్లు తెలుస్తోంది. ఎలా చూసినా, తిరుపతి ఉప ఎన్నిక వైసీపీకి అంత ఈజీ కాదు.