సమైక్యాంధ్ర హోరులో కలెక్షన్ల తుఫాను.. అత్తారింటికి దారేదికి 7 ఏళ్లు

సగం సినిమా లీకైపోతే ఆ సినిమా భవిష్యత్ చీకటైపోతుంది. ఏకంగా ల్యాబ్ నుంచే అఫిషియల్ ప్రింట్ వచ్చేస్తే.. నిర్మాతకు కన్నీరే. కానీ.. ఓ సినిమా అలాంటి విపత్కర పరిస్థితు నడుమ విడుదలై ఏకంగా బక్సాఫీస్ లెక్కల్ని మార్చేస్తుందంటే నమ్మగలమా..? పవన్ కల్యాణ్ హీరోగా వచ్చిన ‘అత్తారింటికి దారేది’ ఆ మ్యాజిక్కే చేసింది. ఆందోళనకర పరిస్థితుల నేపథ్యంలో విడుదలై ఇండస్ట్రీ హిట్ సాధించింది. ఇదంతా పవన్ కల్యాణ్ క్రేజ్ తోనే సాధ్యమైందని చెప్పాలి. ప్రభంజనం సృష్టించిన త్రివిక్రమ్ మ్యాజిక్, పవన్ మ్యానియాకు నేటితో 7 ఏళ్లు.

ఆ సమయంలో తెలంగాణ, ఆంధ్ర సమస్యలు.. సమైక్యాంధ్ర ఉద్యమంతో హోరెత్తిపోతుంది. ఈ సమయంలో సినిమా లీకై అందరి సెల్ ఫోన్లలోకి చేరిపోయింది. సెప్టెంబర్ 24న జరిగిన ఈ ఘటనతో నిర్మాత తప్పనిసరి పరిస్థితుల్లో సెప్టెంబర్ 27న సినిమా విడుదల అని ప్రకటించేశారు నిర్మాత భోగవల్లి ప్రసాద్. సెప్టెంబర్ 27న తెల్లవారుఝామున షోలు పడ్డాయి. పవన్ ఫ్యాన్స్ హంగామాతో ధియేటర్లు దద్దరిల్లిపోయాయి. కానీ, నిర్మాత, దర్శకుడు, హీరో ఆందోళనతోనే ఉన్నారు.

గంటల వ్యవధిలో వారు ఆనందంలో మునిగిపోయే వార్త వచ్చింది. రాష్ట్రమంతటా అద్భుతమైన రెస్పాన్స్. ప్రతిచోటా సూపర్ హిట్ టాక్ తో హోరెత్తిపోయింది. అభిమానుల సంబరాలతో ధియేటర్లు మోగిపోయాయి. సూపర్ హిట్ టాక్ తో వచ్చిన సినిమా ఇండస్ట్రీ హిట్ సాధించింది. 2009లో మగధీర సృష్టించిన ఇండస్ట్రీ రికార్డులను తిరగరాస్తూ 100 కోట్ల మైలురాయి దాటేసింది. పవన్ నటన, త్రివిక్రమ్ మ్యాజిక్ కు ప్రేక్షకులు ఫిదా అయిపోయారు. దీంతో పవన్ కెరీర్లో ఈ సినిమా ప్రత్యేకంగా నిలిచిపోయింది.