రాజకీయ వైపరీత్యం: వైఎస్‌ జగన్‌కి గుడి కట్టేస్తున్నారట.!

కొన్నేళ్ళ క్రితం తమిళనాడులో అప్పటి గ్లామరస్‌ హీరోయిన్‌ ఖుష్బూకి గుడి కట్టేశారు అభిమానులు. అప్పట్లో అదో పెను సంచలనం. దేశవ్యాప్తంగా ఈ విషయమై పెద్ద రచ్చే నడిచింది. ఆ తర్వాత కొందరు హీరోయిన్లకు ఇలాగే అభిమానులు గుడి కట్టేశారు. దీన్ని అభిమానం అనాలా.? వేలం వెర్రి అనాలా.? అన్నది అర్థం కాని ప్రశ్న. ఇక, బతికున్న నాయకులు తమ విగ్రహాల్ని పెట్టించుకోవడం కూడా అప్పుడప్పుడూ చూస్తుంటాం. ‘ఇదేం పైత్యం.?’ అని జనం ముక్కున వేలేసుకుంటున్నా, రాజకీయ నాయకులు, వారి అనుచరులు.. పబ్లిసిటీ స్టంట్లు చేస్తూనే వుంటారనుకోండి.. అది వేరే సంగతి.

చాలా చాలా అరుదుగానే బతికున్న నాయకులు తమ విగ్రహాల్ని పెట్టించేసుకుంటుంటారు. ఇదో టైపు పబ్లిసిటీ. ఇక, పశ్చిమగోదావరి జిల్లాలో ముఖ్యమంత్రి వైఎస్‌ జగన్‌ మోహన్‌రెడ్డికి గుడి కట్టేస్తున్నారు స్థానిక వైసీపీ నేతలు. సాక్షాత్తూ ఎమ్మెల్యే తలారి వెంకట్రావు ఈ గుడి నిర్మాణానికి శంకుస్థాపన చేశారు. అధికారంలోకి వచ్చిన ఏడాది కాలంలోనే సంచలన నిర్ణయాలు తీసుకున్నారనీ, కరోనా సంక్షోభంలోనూ ధైర్యంగా సంక్షేమ పథకాలు అమలు చేస్తున్నారనీ, ఈ నేపథ్యంలోనే స్థానిక నేతలు గుడి నిర్మాణానికి శ్రీకారం చుట్టారని చెప్పారు తలారి వెంకట్రావు.

సంక్షేమ పథకాలకి వైఎస్‌ జగన్‌ మాత్రమే ఆద్యుడా.? అసలు వైఎస్‌ జగన్‌కి గుడి కట్టాల్సిన అవసరమేమొచ్చింది.? జగన్ ఏమన్నా తన సొంత సొమ్ముతో సంక్షేమ పథకాల్ని చేపడ్తున్నారా.? సొంత ఖర్చులతో రాష్ట్రాన్ని ఉద్ధరించేస్తున్నారా.? ఇదెక్కడి పైత్యం.? అని జనం ముక్కున వేలేసుకుంటున్నారు. ‘ఈ తరహా వ్యవహారాలు సెంటిమెంట్‌ పరంగా కూడా మంచివి కావు. ఇలాంటి వ్యవహారాలపై జగన్‌ చర్యలు తీసుకుంటే మంచిది..’ అని వైసీపీ సానుభూతిపరులే సోషల్‌ మీడియా వేదికగా తమ అభిప్రాయాల్ని కుండబద్దలుగొట్టేస్తున్నారు.

తెలంగాణ రాష్ట్ర సాధన నేపథ్యంలో సోనియమ్మకు గుడి కట్టేశాడో కాంగ్రెస్‌ నేత. అప్పట్లో అదో పెద్ద కామెడీగా మారిపోయింది. ఇలా రాజకీయ నాయకుల విగ్రహాలు పెట్టేవారు, గుడులు కట్టేవారు.. కాలక్రమంలో పార్టీలు మారిన దాఖలాలూ లేకపోలేదు. మరి, ఆయా నేతల మీద వారికి వున్న ‘భక్తి’లో చిత్తశుద్ధి ఎంత.? ఏమోగానీ, ఆంధ్రప్రదేశ్‌లో రాజకీయం వెర్రితలలు వేస్తోందనడానికి ఇదో నిదర్శనమని రాజకీయ పరిశీలకులు అభిప్రాయపడ్తున్నారు. అన్నట్టు, ఈ ఐడియా తెలుగు తమ్ముళ్ళకి రాకపోవడమే శోచనీయం. లేకపోతే, అటు ఎన్టీఆర్‌కీ.. ఇటు చంద్రబాబుకీ.. రాష్ట్ర వ్యాప్తంగా వందలాది వేలాది గుడుల్ని నిర్మించేసి వుండేవారే.!