టీడీపీ మార్కు చారిత్రక తప్పిదం.! ఇక గల్లంతైపోయినట్టే.!

నాలుగు దశాబ్దాల రాజకీయ అనుభవం.. అని పదే పదే టీడీపీ అధినేత నారా చంద్రబాబునాయుడు చెబుతుంటారు. స్థానిక ఎన్నికలు ఏ ప్రాతిపదికన జరుగుతాయో, ఎలాంటి రాజకీయాలు ఆ ఎన్నికల చుట్టూ వుంటాయో.. చంద్రబాబుకి తెలియదని ఎలా అనుకోగలం.?

తాను అధికారంలో వున్నప్పుడు నిర్వహించాల్సిన స్థానిక ఎన్నికల్ని చంద్రబాబు వాయిదా వేస్తూ వచ్చారు. లేకపోతే, ఆ స్థానిక ఎన్నికలు టీడీపీకి రాజకీయంగా ఎంతగానో ఉపయోగపడేవి. అధికారంలో ఎవరుంటే, వాళ్ళకే దాదాపుగా స్థానిక ఎన్నికలు అనుకూలమవుతాయి. ఒకవేళ అనుకూలంగా లేకపోయినా, తమకు అనుకూలంగా మార్చేసుకునే వీలు అధికార పార్టీకి కలుగుతుంది. ఆ అద్భుత అవకాశాన్ని చంద్రబాబు వదిలేసుకున్నారు.. టీడీపీని నట్టేట్లో ముంచేశారు.

అంతకు మించి.. అనే స్థాయిలో అడ్డగోలుగా వైసీపీ ప్రభుత్వం స్థానిక ఎన్నికల్ని నిర్వహించింది. అధికారాన్ని పూర్తిగా దుర్వినియోగం చేసి, స్థానిక ఎన్నికల్లో పై చేయి సాధించింది. ఎంపీటీసీ, జెడ్పీటీసీ ఎన్నికల్ని మాత్రమే బహిష్కరించి.. టీడీపీ అధినేత చంద్రబాబు చారిత్రక తప్పిదం చేసేశారు. ఇక, టీడీపీ కోలుకోవడం దాదాపుగా అసాధ్యం. పార్టీ శ్రేణులకు సమాధానం చెప్పుకోలేని స్థితికి చంద్రబాబు దిగజారిపోయారిప్పుడు.

గట్టి పోటీ ఇచ్చి ఓడిపోయినా.. అదో లెక్క. పోటీలో టీడీపీ అభ్యర్థులున్నారు.. వాళ్ళలో చాలామంది ఓడిపోయారు.. కారణం, టీడీపీ.. పరిషత్ ఎన్నికల్ని బహిష్కరించడమే.! బహిష్కరించకుండా వుంటే, టీడీపీ గెలిచేదా.? అలాగని అనలేంగానీ.. కనీసం పార్టీ శ్రేణుల్లో కాస్తంతైనా హంగామా కనిపించేది. సరిదిద్దుకోలేని తప్పు ఇది. రాజకీయంగా చంద్రబాబు వేసిన ఈ తప్పటడుగు.. టీడీపీని పూర్తిగా పాతాళానికి తొక్కేసింది.

అంతే కాదు, చంద్రబాబు నిర్ణయంతో.. వైసీపీ బలం పదింతలు పెరిగినట్లయ్యింది.. వైసీపీని ఉద్ధరించడమే పనిగా పెట్టుకున్నారా చంద్రబాబు.? అన్న చర్చ జరుగుతోందిప్పుడు. అయినా, పరిషత్ ఎన్నికలు పద్ధతి ప్రకారం జరిగాయని ఎలా అనగలం.? అసలు వీటిని ఎన్నికలని ఎవరైనా అంటారా.? ఎంపికలు మాత్రమే.. అన్నది రాజకీయ విశ్లేషకుల వాదన. ఈ ఎంపికలకి సంబంధించి తొలి ముద్దాయి వైసీపీ అయితే, రెండో ముద్దాయి టీడీపీ.