అప్పుడు యెల్లో.. ఇప్పుడు బ్లూ.. ప్రకటనల తీరు మారదా.?

టీడీపీ హయాంలో పసుపు రంగుతో కూడిన ప్రకటనల్ని చూశాం. ‘పసుపు శుభప్రదం’ అంటూ తమ ‘పచ్చ పబ్లిసిటీ స్టంట్స్‌’కి తమదైన నిర్వచనాన్ని ఇచ్చారు అప్పట్లో టీడీపీ నేతలు. అధికారం టీడీపీ నుంచి వైసీపీకి వచ్చింది. దాంతో, ఇప్పుడు ప్రకటనల్లో ఎక్కువగా ‘బ్లూ కలర్‌’ కన్పిస్తోంది. టీడీపీది ఒకటే రంగు.. అదే పసుపు. వైసీపీకి అలా కాదు కదా. పసుపుతోపాటు తెలుపు, గ్రీన్‌ కలర్‌ కూడా వున్నాయి. అందుకే, ఇంకాస్త ముందడుగు వేసి.. ప్రభుత్వ కార్యాలయాలకీ తమ పార్టీ రంగులు వేసేసుకుంది వైసీపీ ప్రభుత్వం. కోర్టు చీవాట్లతో ఆ ప్రక్రియ ఆగినా, కొన్ని చోట్ల ఇంకా ఆ రంగుల పైత్యం కన్పిస్తూనే వుంది.

ఇక, అసలు విషయానికొస్తే.. ప్రభుత్వ ప్రకటనల్లో వైసీపీ జెండా రంగులు, వైఎస్‌ జగన్‌ ఫొటోలతోపాటు మంత్రుల ఫొటోలు, వైఎస్‌ జగన్‌ తండ్రి రాజశేఖర్‌రెడ్డి ఫొటోలను ఆక్షేపిస్తూ న్యాయస్థానంలో పిటిషన్‌ దాఖలైంది. ‘అది ప్రజా ప్రయోజన వ్యాజ్యం కాదు.. రాజకీయ ప్రయోజన వ్యాజ్యం’ అని ప్రభుత్వం తరఫున న్యాయవాది తమ వాదన విన్పించారు.

‘ముఖ్యమంత్రి ఫొటోతోపాటు మంత్రుల ఫొటోలు వుండకూడదని రూల్‌ ఏమీ లేదు కదా.! వైఎస్‌ రాజశేఖర్‌రెడ్డి ఫొటో వుంటే తప్పేంటి.?’ అని న్యాయస్థానం వ్యాఖ్యానించింది. ఇది నిజంగానే అధికార పార్టీకి పెద్ద ఊరట. ప్రతిసారీ న్యాయస్థానం నుంచి మొట్టికాయలు ఎదురవుతుండడంతో, న్యాయస్థానాలపైనా జుగుప్సాకరమైన వ్యాఖ్యలు చేసిన బులుగు బ్యాచ్‌.. ‘చూశారా.. న్యాయం మా వైపే వుంది..’ అంటూ రెచ్చిపోతోందిప్పుడు సోషల్‌ మీడియాలో.

అయితే, ఈ రంగులపైనా, ఫొటోలపైనా దాఖలైన పిటిషన్‌ని వేరే ధర్మాసనానికి బదిలీచేసింది తప్ప.. న్యాయస్థానం కొట్టిపారేయలేదు. పైగా, న్యాయమూర్తి ‘వ్యక్తిగతంగా తాను ఈ తరహా ఫొటోల పబ్లిసిటీని సమర్థించను..’ అని వ్యాఖ్యానించడం గమనార్హం.

ఇది నైతికతకు సంబంధించిన అంశం. ప్రభుత్వం ఖర్చు చేస్తున్నది ప్రజాధనం. ఖజానా నుంచి ఖర్చు చేసే ప్రతి రూపాయికీ జవాబుదారీగా వ్యవహరించాల్సిన ప్రభుత్వ పెద్దలు, తమ సొంత పబ్లిసిటీ కోసం, తమ పార్టీ పబ్లిసిటీ కోసం ఉపయోగిస్తుండడం ఎట్టి పరిస్థితుల్లోనూ సమర్థనీయం కాదు. చంద్రబాబు హయాంలో జరిగిందీ తప్పే.. ఇప్పుడు వైఎస్‌ జగన్‌ హయాంలో జరుగుతున్నదీ తప్పే. ఇందులో ఇంకో మాటకు తావు లేదు