పాపం తమ్మినేని.. ‘గొంతు’ నొక్కేశారెందుకని!

శ్రీకాకుళం జిల్లాకు సంబంధించినంతవరకు పవర్‌ ఫుల్‌ పొలిటికల్‌ లీడర్స్‌ లిస్ట్‌ తీస్తే, అందులో తమ్మినేని సీతారాం పేరు కూడా ఖచ్చితంగా వుంటుంది. ఒకానొక టైమ్‌లో ఆయన యూత్‌ ఐకాన్‌గా చిక్కోలులో బోల్డంత ఫ్యాన్‌ ఫాలోయింగ్‌ సంపాదించారు. ఇప్పుడంటే ఆయన కళింగ సామాజిక వర్గానికి చెందిన నేత.. అని ప్రచారంలోకి వస్తున్నారుగానీ, గతంలో ఆయన చుట్టూ అస్సలేమాత్రం సామాజిక వర్గం తాలూకు ప్రభావం వుండేది కాదు.

టీడీపీలో వున్నప్పుడు తమ్మినేని సీతారాం, కింజరాపు ఎర్రన్నాయుడు మధ్య ఆధిపత్య పోరు నడిచేది. అయితే, రాజకీయంగా వేసిన కొన్ని తప్పడగులు తమ్మినేని సీతారాం ఇమేజ్‌ని రాజకీయాల్లో బాగా తగ్గించేశాయన్నది నిర్వివాదాంశం. మళ్ళీ ఇన్నేళ్ళకు తమ్మినేని సీతారాం పేరు తెలుగునాట మార్మోగిపోతోంది. ఆంధ్రప్రదేశ్‌ అసెంబ్లీ స్పీకర్‌గా తమ్మినేని సీతారాం పేరుని ముఖ్యమంత్రి వైఎస్‌ జగన్‌ మోహన్‌ రెడ్డి ఖరారు చేశారు.

అయితే, తమ్మినేని అభిమానులు మాత్రం తమ అభిమాన నేతకు అన్యాయం జరిగిందని వాపోతున్నారు. కారణం, తమ్మినేని సీతారాంకి మంత్రి వర్గంలో చోటు దక్కుతుందనీ, అది కూడా కీలక పదవి దక్కుతుందని వారు ఆశించడమే. ఉప ముఖ్యమంత్రి అవ్వగల స్టామినా వున్న తమ్మినేని సీతారాంను స్పీకర్‌ పదవిలో కూర్చోబెట్టడం ద్వారా ఆయన గొంతు నొక్కేశారనే భావన చాలామందిలో విన్పిస్తోంది. స్పీకర్‌ అంటే, ఇకపై రాజకీయాలకు అతీతంగా వ్యవహరించాల్సి వస్తుంది.

చంద్రబాబు హయాంలో స్పీకర్‌గా పనిచేసిన కోడెల శివప్రసాద్‌ మాత్రమే ఒకింత భిన్నంగా వ్యవహరించారు. ఫక్తు టీడీపీ నేతగా ఆయన వ్యవహరించేవారు. రాజకీయ విమర్శలు చేయడం ద్వారా స్పీకర్‌ పదవికి కళం తెచ్చారనీ, ఆ కారణంగానే ఆయన తాజా ఎన్నికల్లో ఘోర పరాజయాన్ని చవిచూడాల్సి వచ్చిందంటారు చాలామంది. వైఎస్‌ జగన్‌ హయాంలో ఆ పరిస్థితి స్పీకర్‌కి వుండకపోవచ్చు. ఎందుకంటే పార్టీ ఫిరాయింపుల్ని ప్రోత్సహించకూడదని వైఎస్‌ జగన్‌ నిర్ణయించుకున్నారు.

ఈ నేపథ్యంలో స్పీకర్‌ పదవిలో తమ్మినేని సీతారాం, తన ఎగ్రెసివ్‌ నేచర్‌కి భిన్నంగా వ్యవహరించి తీరాల్సిందే. అన్నట్టు, స్పీకర్‌ పదవిలో కూర్చున్నవారు ఆ తర్వాతి ఎన్నికల్లో ఓడిపోవడం ఖాయమనే సెంటిమెంట్‌ ఒకటి బలంగా వుంది. దాంతో, తమ్మినేని అభిమానులు తమ అభిమాన నేతని ఇలా దెబ్బకొట్టారంటూ చర్చించుకుంటుండడం గమనార్హం. స్పీకర్‌ పదవిని దాదాపు చాలామంది వైసీపీ ఎమ్మెల్యేలు వద్దనుకున్నాక, చివరికి తమ్మినేని సీతారాంకి వైఎస్‌ జగన్‌ అంటగట్టారన్న ప్రచారమూ లేకపోలేదు.