సస్పెన్షన్: అనంతబాబుపై వేటు.. రఘురామపై ఎందుకు డౌటు.?

ఎక్కడో ఏదో తేడా కొడుతోంది.! వైసీపీ నుంచి ఎమ్మెల్సీ అనంతబాబుని సస్పెండ్ చేసింది వైసీపీ అధిష్టానం. నిజానికి, ఆయనతో తొలుత ఎమ్మెల్సీ పదవికి రాజీనామా చేయించి, ఆ తర్వాత పార్టీ నుంచి బయటకు గెంటేయాలి. ఎందుకంటే, ‘నా కారు డ్రైవర్‌ని నేనే చంపాను..’ అని స్వయంగా అనంతబాబు పోలీసుల విచారణలో అంగీకరించాడు గనుక.!

మరి, వైసీపీ ఎంపీ రఘురామకృష్ణరాజు విషయంలో ఎందుకు వైసీపీ ‘సస్పెన్షన్ అస్త్రాన్ని’ ప్రయోగించలేకపోతోంది.? అనంతబాబు విషయంలో చేసిన ధైర్యం, రఘురామ విషయంలో వైసీపీ ఎందుకు చేయలేకపోతోందన్నది చర్చనీయాంశంగా మారింది.

‘బస్తీ మే సవాల్.. దమ్ముంటే నన్ను పార్టీ నుంచి సస్పెండ్ చేసుకోండి..’ అంటూ రఘురామ సవాల్ విసురుతున్నాగానీ, వైసీపీ అధిష్టానం, ఆయన విషయంలో చేష్టలుడిగా చూస్తోంది. అధికారం చేతిలో వుంది గనుక, అడ్డమైన కేసులూ బనాయించి, ఆయన్ని ఉక్కిరిబిక్కిరి చేసేందుకు మాత్రమే వైసీపీ ప్రయత్నిస్తోంది తప్ప, ఆయన మీద సస్పెన్షన్ వేటు మాత్రం వేయడంలేదు.

ఎందుకిలా.? ఇదే ఇప్పుడు రాష్ట్ర రాజకీయాల్లో హాట్ టాపిక్ అయ్యింది. రఘురామ నిత్యం వైసీపీని విమర్శిస్తూనే వున్నారు. వైసీపీ నేతల్ని తిడుతూనే వున్నారు. అయినా, ఆయన మీద వైసీపీ అధిష్టనానికి మమకారం తగ్గడంలేదు. రఘురామను పార్టీ నుంచి సస్పెండ్ చేసేంత ధైర్యం అధిష్టానంలో కనిపించడంలేదు.

ఇక్కడ విషయం చాలా క్లియర్. రఘురామని వైసీపీ సస్పెండ్ చేస్తే, ఆ తర్వాత ఆయన మరింతగా చెలరేగిపోతారు. పైగా, ఆయన మీద అనర్హత వేటు పడేందుకు అవకాశాలు సన్నగిల్లిపోతాయ్. అలాగని, ఇప్పుడేమన్నా అనర్హతకు ఆస్కారం వుందా.? అంటే, అదీ లేదాయె.!

నాటకం.. జగన్నాటకం.! మహానాటకం.! ఇదీ రఘురామ విషయంలో అధికార పార్టీ తీరు తెన్నులపై వినిపిస్తోన్న విమర్శల సారాంశం. అనంతబాబుతో ఎమ్మెల్సీ పదవికి ఎందుకు రాజీనామా చేయించలేదంటే, ఆయనకు క్లీన్ చిట్ వచ్చేలా చేసి, తిరిగి పార్టీలో చేర్చుకునేందుకేనన్న వాదన కూడా బలంగా వినిపిస్తోంది లెండి.! ఇదీ వైసీపీ మార్కు రాజకీయం.