మైక్రోసాఫ్ట్ చైర్మన్ గా సత్యనాదెళ్ల

ప్రముఖ టెక్ కంపెనీ మైక్రోసాఫ్ట్ లో కీలక మార్పులు చోటుచేసుకున్నాయి. ప్రస్తుత సీఈఓ సత్యనాదెళ్లకు మరిన్ని బాధ్యతలు అప్పగించారు. మైక్రోసాఫ్ట్ బోర్డు చైర్మన్ గా సత్య నాదెళ్లను ఎన్నుకున్నారు. ఈ మేరకు బోర్డ్ ఆఫ్ డైరెక్టర్స్ ఏకగ్రీవంగా సత్యనాదెళ్ల పేరుకు ఆమోదం తెలిపారు. ఇప్పటివరకు చైర్మన్ గా ఉన్న జాన్ థామ్సన్ ను స్వతంత్ర డైరెక్టర్ గా నియమించారు. సత్యనాదెళ్ల 2014లో స్టీవ్ బామర్ నుంచి సీఈఓగా బాధ్యతలు స్వీకరించారు. ఆయన పగ్గాలు చేపట్టాక కంపెనీలో కీలక మార్పులు చేశారు. కొత్తతరం టెక్నాలజీ వైపు కంపెనీని నడిపించారు. అలాగే క్లౌడ్ కంప్యూటింగ్ రంగంపై విస్తృతంగా పనిచేసింది. మొబైల్ రంగంపై ఎక్కువగా దృష్టిపెట్టింది. 1975లో మైక్రోసాఫ్ట్ ప్రారంభమైంది. అనంతరం చాలాకాలంపాటు పర్సనల్ కంప్యూటర్ల సాప్ట్ వేర్ ప్యాకేజీల తయారీపైనే పనిచేసింది. సత్యనాదెళ్ల సీఈఓ అయిన తర్వాత సంస్థను మొబైల్ రంగం వైపు కూడా మళ్లించారు. తాజాగా బోర్డు చైర్మన్ గా ఎన్నికవడంతో ఆయన బాధ్యతలు మరింత పెరిగినట్టయింది.