‘ఆ పుకార్ల’పై జనసేన అధినేత పవన్ స్పందించాల్సిందేనా.?

జనసేన అధినేత పవన్ కళ్యాణ్ రాజ్యసభకు వెళ్ళబోతున్నారట.. ఆయన కేంద్ర మంత్రి కూడా అవబోతున్నారట.. మెగాస్టార్ చిరంజీవి కూడా రాజ్యసభకు వెళతారట.. ఈయనకీ కేంద్ర మంత్రి అయ్యే ఛాన్స్ వుందట. అసలు సాధ్యమయ్యే వ్యవహారాలేనా ఇవి.? ఇద్దరిలో ఎవరో ఒకరికి ఛాన్స్ వుందంటే.. అదో లెక్క. చిరంజీవి, ప్రత్యక్ష రాజకీయాలకు దూరంగా వున్నారు.

పవన్ కళ్యాణ్ ఏనాడూ పదవుల కోసం పాకులాడలేదు. మరెలా, పై పుకార్లు నిజమవుతాయి.? అసలు అవన్నీ ‘పుకార్లు’ అని దాదాపు అన్ని మీడియా సంస్థలూ కుండబద్దలుగొట్టేస్తున్న విషయం విదితమే. అలా కుండబద్దలుగొట్టేస్తూనే, ఈ పుకార్లపై జనసేన అధినేత పవన్ ఎందుకు స్పందించడంలేదు.? జనసేన పార్టీ కనీసం ఎందుకు ప్రెస్ నోట్ విడుదల చేయడంలేదు.? అంటూ మళ్ళీ కొత్త రచ్చ షురూ చేశాయి.

జనసేన పార్టీకి ప్రెస్ నోట్లు విడుదల చేయడం ఓ అలవాటు.. అని వెటకారం చేస్తున్న ‘పైశాచిక మీడియా’నే, ఆ ప్రెస్ నోట్ కోసం తహతహలాడిపోతోంది. ఓ జనసేన నేత ఈ విషయమై స్పందిస్తూ, ‘అతి మూత్ర వ్యాధి వున్న కొందరు మీడియా అధిపతులు, ఈ పుకార్లను తయారు చేసి, ఆ పుకార్లపై జనసేన అధినేత నుంచి స్పందనను ఆశిస్తున్నారు..’ అంటూ ఎద్దేవా చేయడం గమనార్హం.

రెండు చోట్లా ఓడిపోయిన పవన్.. అంటూ ప్రతిసారీ విమర్శలు చేసే సదరు మీడియా సంస్థలు, ఇప్పుడు పవన్ రాజ్యసభకు వెళతారన్న పుకార్లతోనే వణికిపోతున్నాయంటే ఏమనుకోవాలి.? ఒకవేళ పుకార్లు నిజమై, జనసేన అధినేత రాజ్యసభకు వెళ్ళి.. కేంద్ర మంత్రి అయిపోతే.. కీలకమైన కేంద్ర మంత్రిత్వ శాఖ ఆయనకు ఏదన్నా దక్కితే.. ‘అతి మూత్ర వ్యాధి గ్రస్తులు’ ఏమైపోతారో.? అన్న చర్చ మీడియా, రాజకీయ వర్గాల్లో జోరుగా సాగుతోంది.

కరోనా బారిన పడ్డ పవన్ కళ్యాణ్, ఆ తర్వాత చాలా రోజులకు కోలుకున్నారు. కోలుకున్నాక కూడా ఇంతవరకు ఆయన మీడియా ముందుకు రాలేదు. జనసేన పార్టీ మాత్రం, ప్రజా సేవలో తన పని తాను చేసుకుపోతోంది. జనసేన అధినేత పవన్ కళ్యాణ్, పార్టీ శ్రేణులకు ఇవ్వాల్సిన సందేశం ఇస్తున్నారు. అధినేత చెప్పిన విషయాల ప్రకారం జనసైనికులు పనిచేస్తున్నారు. మధ్యలో ఈ పుకార్ల గోలేంటి.? ఆ పుకార్లను తయారు చేసినోళ్ళే, పవన్ కళ్యాణ్ స్పందించడంలేదు, జనసేన ప్రెస్ నోట్ కూడా విడుదల చేయడంలేదంటూ వెర్రెత్తిపోవడమేంటి.?