Shoaib Malik: పాకిస్థాన్ మాజీ కెప్టెన్ షోయబ్ మాలిక్ (Shoaib Malik) మూడో పెళ్లి చేసుకోవడం సంచలనం రేపింది. దీంతో సానియా మీర్జా (Sania Mirza), షోయబ్ భార్యాభర్తల బంధం నుంచి విడిపోయారని వస్తున్న వార్తలకు బలం చేకూరినట్టయింది. దీనిపై సానియా మీర్జా తండ్రి ఇమ్రాన్ మీర్జా స్పందించారు.
‘సానియా మీర్జా తన వ్యక్తిగత జీవితాన్ని ఎప్పుడూ గోప్యంగానే ఉంచుకుంది. షోయబ్ మూడో పెళ్లి చేసుకోవడంతో స్పందించాల్సి వస్తుంది. సానియా-షోయబ్ ముస్లిం చట్టం ‘ఖులా’ ప్రకారం విడిపోయారు. వారిద్దరి మధ్యా “ఓపెన్ నెస్” ఉంది. మరో వివాహం చేసుకున్న షోయబ్ కొత్త జీవితం బాగుండాలని కూడా సానియా శుభాకాంక్షలు తెలిపింద’ని అన్నారు.
షోయబ్-సానియా విడిపోవడానికి స్పష్టమైన కారణాలు తెలియరాలేదు. అయితే.. షోయబ్ వివాహేతర సంబంధాలే కారణమని పాకిస్థాన్ మీడియా పేర్కొంటోంది. వీరిద్దరి విడాకులే కాకుండా సానియాతో షోయబ్ విడిపోవడం కూడా అతడి కుటుంబసభ్యులకు ఇష్టంలేదని పేర్కొంది. అందుకే షోయబ్ మూడో వివాహానికి వారు హాజరుకాలేదని తెలుస్తోంది. షోయబ్ పెళ్లాడిన సనా జావెద్ కు ఇది రెండో వివాహం.