గట్టి చట్నీ రాజకీయం: ఇంత నిస్సిగ్గుగానా.?

నియోజకవర్గంలో ప్రజలేమనుకుంటారన్న సోయ లేదు.. తమను చట్ట సభలకు పంపించిన ప్రజలకు సేవ చేయాలన్న ఇంగితం అసలే లేదు.! నిస్సిగ్గుగా ‘గట్టి చట్నీ’ గురించి మాట్లాడుతున్న ప్రజా ప్రతినిథుల్ని చూస్తే ఏమనాలో అర్థం కావడంలేదు ప్రజలకి.

నగిరి ఎమ్మెల్యే రోజా గురించే ఇదంతా. అప్పుడెప్పుడో తిరుపతి లోక్‌సభ ఉప ఎన్నిక నేపథ్యంలో టీడీపీ నేత కింజరాపు అచ్చెన్నాయుడికి సంబంధించిన ఓ వీడియో క్లిప్ లీక్ అయ్యింది. అందులో, ‘పార్టీ లేదు తొక్కా లేదు.. గట్టి చట్నీ వెయ్..’ అని అచ్చెన్నాయుడు అన్నట్టుగా వైసీపీ ప్రొజెక్షన్ చేసింది. సరే, అచ్చెన్న.. సొంత పార్టీ విషయమై ఎలాంటి అభిప్రాయంతో వున్నారన్నది వేరే చర్చ.

తాజాగా, ఆనాటి ఆ గట్టి చట్నీ వ్యవహారాన్ని వైసీపీ ఎమ్మెల్యే రోజా తెరపైకి తెచ్చారు. ‘అచ్చెన్న గట్టి చట్నీ తింటే 160 కేజీల బరువు పెరుగుతారేమోగానీ.. తల్లకిందులుగా తపస్సు చేసినా టీడీపీకి 160 సీట్లు వచ్చే అవకాశమే లేదు.. 2019 ఎన్నికల్లో వచ్చిన 23 సీట్లు కూడా రావు..’ అని అన్నారు రోజా.

అసలు ఇక్కడ గట్టి చట్నీ, 160 కేజీల బరువు ప్రస్తావన ఎందుకు వచ్చినట్లు.? రోజా తన ఇంట్లో ఏం తింటున్నారో ఎవరన్నా అడిగారా.? రోజా బరువెంత.? అని ఎవరైనా అడగడం సబబేనా.?
అచ్చెన్నాయుడు ప్రజా ప్రతినిథిగా సరిగ్గా పని చేయకపోతే వచ్చే ఎన్నికల్లో ఆయన్ని ప్రజలే ఇంటికి పంపుతారు. అచ్చెన్న బరువు పెరిగితే, ఆయనకు అది అనారోగ్యాన్ని తెచ్చిపెడుతుంది. ఇక్కడ వైసీపీ ఎమ్మెల్యే రోజాకి ఆయన గట్టి చట్నీ తినడం వల్ల, బరువు పెరగడం వల్ల వచ్చే సమస్య ఏంటో ఎవరికైనా అర్థమయ్యిందా.?

రాజకీయాల్లో విలువలు ఎంతలా దిగజారిపోయాయో చెప్పడానికి ఇంతకన్నా నిదర్శనం ఇంకోటి అవసరం లేదు. వీళ్ళా ప్రజా ప్రతినిథులు.. అని జనం ఛీత్కరించుకుంటోన్నది ఇందుకే మరి. సొంత పార్టీలో, సొంత నియోజకవర్గంలో రోజాపై వెల్లువెత్తుతున్న వ్యతిరేకత గురించి కొత్తగా చెప్పేదేముంది.? ఆ సమస్యల్ని తొలుత పరిష్కరించుకుని.. ఇతరుల బరువు, ఇతరుల ఆహారటపులవాట్ల గురించి రోజా సెటైర్లేస్తే మంచిది.!