గోకుతున్న ఆర్జీవీ: ‘పబ్లిసిటీ’ వింత జీవికి ఎందుకీ దురద?

వైఎస్‌ జగన్‌ మోహన్‌ రెడ్డి ముఖ్యమంత్రి అయితే సినీ దర్శకుడు రామ్‌ గోపాల్‌ వర్మ చంకలు గుద్దుకోవడమేంటట? ఆయనంతే, అదో టైపు. స్వర్గీయ ఎన్టీఆర్‌ బయోపిక్‌ని నందమూరి బాలకృష్ణతో తీద్దామనుకుని భంగపడ్డ దర్శక ‘రాము’డు, ఆ కసినంతా ‘లక్ష్మీస్‌ ఎన్టీఆర్‌’ రూపంలో నారా చంద్రబాబునాయుడు మీద చూపించారు. అదేంటీ, బాలకృష్ణ కదా, ఆర్జీవీని వద్దనుకున్నది, పైత్యం అనేది ఏమన్నా చూపించాలనుకుంటే అది బాలకృష్ణ మీద చూపించి వుండాలి! కానీ, వర్మకి అంత ధైర్యమెక్కడిది? బాలకృష్ణతో పెట్టుకుంటే, వ్యవహారం ఇంకోలా వుంటుంది.

వైఎస్సార్‌ కాంగ్రెస్‌ పార్టీ మద్దతు తీసుకుని, ‘లక్ష్మీస్‌ ఎన్టీఆర్‌’ సినిమా పేరుతో చంద్రబాబు మీదకు బాణం ఎక్కుపెట్టి, ‘దురద’ తీర్చుకున్న వర్మ, దర్శకుడిగా ఆ సినిమాతో పొందిన లాభమేమీ లేదు, కాస్తంత పబ్లిసిటీ దక్కించుకోవడం తప్ప. సినిమాలు బాక్సాఫీస్‌ వద్ద తుస్సుమంటోంటే, ట్విట్టర్‌లో వర్మ పోస్టింగులు మాత్రం భలేగా పేలుతున్నాయి. అదీ ఓ ఘనతేనా? అనకండి. వర్మ స్థాయి సంచలన దర్శకుడి నుంచి, ట్విట్టర్‌ సంచలనం దాకా పడిపోయింది మరి. ఇప్పుడీ వర్మగారు, కులాల మధ్య కుంపటిని రాజేస్తున్నారు.

లేకపోతే, ‘కమ్మ రాజ్యంలో కడప రెడ్లు’ అంటూ సినిమా తీయడమేంటి? సినిమా తీయాలనుకుంటున్నాడంటే, అది ఆయనిష్టం కావొచ్చు. ఓ క్రియేటివ్‌ డైరెక్టర్‌కి ఎలాంటి ఆలోచనైనా రావొచ్చు. దాని పర్యవసానాలు ఫేస్‌ చేయడానికీ రెడీ అవ్వాలి. కానీ, వర్మ రూటే సెపరేటు. ఎవర్నయినా ఆయన తిడతాడు, ఎవరూ ఆయన్ని తిట్టకూడదు. ఏమీ ఊసుపోకపోతే, పవన్‌కళ్యాణ్‌ ఫ్యాన్స్‌ని రెచ్చగొడతాడాయన. ‘నన్ను ఈ మధ్య పవన్‌ ఫ్యాన్స్‌ తిట్టడం మానేశారు, ఓసారి తిట్టించుకుంటా’ అని చెప్పి మరీ తిట్టించుకునే రకం వర్మ. అలాగే, ఇప్పుడు కమ్మోళ్ళతో తిట్టించుకుంటున్నారాయన.

కమ్మోళ్ళని అనే కాదు, కులం పేరు చెప్పి ఎవర్ని తక్కువ చూసినా, కులాభిమానం వున్నోళ్ళు ఊరుకుంటారా? తిరగబడ్తారు. అదే వర్మకి కావాల్సింది కూడా. తిట్టించుకుని, తిట్టించుకుని.. చివరికి ‘కనీసం కుక్కల్లా అయినా మొరగండి..’ అని కమ్మోళ్ళకి ఉచిత సలహా ఇచ్చాడు వర్మ. మొరగడమేం ఖర్మ, కరుస్తాం.. అని వర్మ మీద ఎవరన్నా దాడి చేస్తే, ఆ తర్వాత ‘ఇది ప్రజాస్వామ్యమేనా?’ అని గొంతు చించుకోవడానికి వర్మ వేసిన పెద్ద స్కెచ్‌ ఇది. కులాల పేరు చెప్పిన కామెంట్లు చేసినా ‘లోపలోసే’ చట్టాలు వస్తే తప్ప, ఇలాంటోళ్ళకి అడ్డుకట్ట పడే అవకాశం వుండదేమో.

ఆంధ్రప్రదేశ్‌లో వైఎస్‌ జగన్‌ ముఖ్యమంత్రి, తెలంగాణలో కేసీఆర్‌ ముఖ్యమంత్రి.. ఈ రెండు రాజ్యాల్లోనూ.. సారీ సారీ, రాష్ట్రాల్లోనూ అధికారం తనదేనన్నట్లు వర్మ వ్యవహరిస్తే ఎలా? సమాజం మీద బాధ్యత లేదు కాబట్టి, కులాల పేరు చెప్పి నోటికొచ్చింది మాట్లాడతానంటే అది తగదు. వర్మలాంటి గొప్ప దర్శకుడికి అసలే తగదు. అయినా ఆ ‘గొప్ప’ ఎప్పుడో కాలగర్భంలో కలిసిపోయి, ఇప్పుడు చీఫ్‌ పబ్లిసిటీ స్టంట్స్‌కి కేరాఫ్‌ అడ్రస్‌గా వర్మ నిలిచిపోయిన సంగతి తెలియనిదెవరికి?