త్వరలో భారత్ నుంచి ఆస్ట్రేలియాకు విమానాలు

భారత్ నుంచి ఆస్ట్రేలియాకు విమాన రాకపోకలను పునరుద్ధరించే విషయంలో ఆ దేశం సానుకూల నిర్ణయం తీసుకుంది. భారత్ లో చిక్కుకుపోయిన తమ దేశవాసులను తరలించేందుకు మే మూడోవారంలో విమానాలు నడిపే అంశాన్ని పరిశీలించనుంది. భారత్ లో కరోనా కల్లోలం నేపథ్యంలో మనదేశం నుంచి విమాన రాకపోకలను నిషేధిస్తూ ఆస్ట్రేలియా నిర్ణయం తీసుకుంది. ఈనెల 15 వరకు ఈ నిర్ణయం అమల్లో ఉంటుందని ప్రకటించింది. దీనికి విరుద్ధంగా భారత్ నుంచి ఎవరైనా వస్తే జైలుశిక్ష, జరిమానా తప్పవని సాక్షాత్తూ ఆసీస్ ప్రధాని స్కాట్ మారిసన్ హెచ్చరించారు. దీనిపై ఆస్ట్రేలియాలో విమర్శలు వెల్లువెత్తాయి. ఈ నేపథ్యంలో భారత్ లో చిక్కుకుపోయి ఇబ్బందికర పరిస్థితులు ఎదుర్కొంటున్నవారిని స్వదేశానికి తీసుకువస్తామని తాజాగా మారిసన్ ప్రకటించారు. వచ్చేవారంతో విమాన రాకపోకలపై నిషేధం ముగిశాక దీనిపై నిర్ణయం తీసుకుంటామని చెప్పారు. భారత్ లో దాదాపు 9వేల మంది ఆస్ట్రేలియన్లు ఉన్నట్టు సమాచారం. వారిలో అత్యవసరంగా స్వదేశానికి వెళ్లాల్సినవారు 900 మంది ఉంటారని తెలుస్తోంది. భారత్ నుంచి ఆస్ట్రేలియా వెళ్లిన తర్వాత వారిని క్వారంటైన్ చేయడానికి కూడా ఆ దేశ ప్రభుత్వం తగిన ఏర్పాట్లు చేస్తోంది.